پی ایس ایکس بہترین اسلامک اسٹاک ایکسچینج ایوارڈ حاصل کرنے میں کامیاب

20 ستمبر ، 2023

کراچی (سٹاف رپورٹر) پاکستان اسٹاک ایکس چینج (پی ایس ایکس) بہترین اسلامک اسٹاک ایکسچینج ایوارڈ حاصل کرنے میں کامیاب ، پاکستان اسٹاک ایکسچینج (پی ایس ایکس) کو گلوبل اسلامک فنانس ایوارڈز (جی آئی ایف اے) کی جانب سے بہترین اسلامک اسٹاک ایکسچینج ایوارڈ 2023 سے نوازا گیا ہے۔ یہ مسلسل تیسرا سال ہے جس میں پی ایس ایکس نے یہ نمایاں اعزاز جیتا ہے۔جی آئی ایف اے بین الاقوامی سطح پر سراہا جانے والا پلیٹ فارم ہے جو اسلامی دنیا میں بینکنگ اور فنانس میں مہارت کو تسلیم کرتا ہے۔ 2011 سے یہ ایوارڈز دنیا بھر میں ان افراد، اداروں اور سرکاری محکموں کو پیش کیے جا رہے ہیں جنہوں نے اسلامی بینکاری اور مالیات کو فروغ دینے اور سماجی ذمہ داری کے عزم کے لیے شاندار کارکردگی دکھائی ہے۔اس موقع پر پی ایس ایکس کے ایم ڈی اور سی ای او فرخ ایچ خان نے کہا، ʼʼپاکستان اسٹاک ایکسچینج کے لیے گلوبل اسلامک فنانس ایوارڈز کی جانب سے مسلسل تیسرے سال گلوبل اسلامک فنانس ایوارڈ ایک قابل فخر اعزاز ہے جو جی آئی ایف اے کی طرف سے اسلامی مالیاتی مصنوعات، پیشکشوں اور ریگولیٹری اضافہ کے حوالے سے ہمارے عزم کو تسلیم کرنے پر ملا ہےانہوں نے کہاپاکستان اسٹاک ایکسچینج شرعی اصولوں کے مطابق مصنوعات اور سرمایہ اکٹھا کرنےکیلئے ایک فعال اور مضبوط پلیٹ فارم ہے۔ پی ایس ایکس پر 251 شریعہ اصولوں کے مطابق کام کرنے والی کمپنیوں کی لسٹنگ کے ساتھ جو کل مارکیٹ کیپ کا 65 فیصد سے زیادہ حصہ ہیں پی ایس ایکس سرمایہ کاروں کو اپنے فنڈز کو اسلامی مالیاتی پیشکشوں میں منتقل کرنے اور مالیاتی اداروں کیلئے نئی مصنوعات بنانے اور لانے کے لیے ایک بہترین پلیٹ فارم فراہم کرتا ہے اور سکوک، شریعہ سے مطابقت رکھنے والے میوچل فنڈز، مضاربہ، ای ٹی ایفس اور دیگر کارپوریٹس اور حکو مت پاکستان کو کیپٹل مارکیٹ سے فنڈز اکٹھا کرنے میں مدد دیتا ہے۔