پائیدار ترقیاتی اہداف کے حصول کیلئے 5 اہم شعبوں میں اقدامات ناگزیر ہیں،نگراں وزیر اعظم

اسلام آ باد ( نمائندہ جنگ) نگراں وزیر اعظم انوار الحق کاکڑ نے کہا ہے کہ پائیدار ترقیاتی اہداف کے حصولِ کیلئے 5 اہم شعبوں خوراک کی پیداوار، بنیادی ڈھانچے میں سرمایہ کاری، صنعت کاری، صحت کی دیکھ بھال کے لچکدار نظام اور ڈیجیٹل تقسیم کو ختم کرنےکے حوالے سے اقدامات ناگزیر ہیں۔منگل کونگراں وزیر اعظم انوار الحق کاکڑ نے گلوبل ڈویلپمنٹ انیشیٹو تعاون کے نتائج پر ایک اعلیٰ سطحی اجلاس میں شرکت کی۔ وزیر اعظم نے اس بات پر روشنی ڈالی کہ پائیدار ترقیاتی اہداف(ایس ڈی جیز)کے حصول کی جانب پیش رفت کو کووڈ، تنازعات اور موسمیاتی تبدیلی کے متعدد بحرانوں کی وجہ سے شدید دھچکا لگا ،تقریب میں چین کے نائب صدر ہان ژینگ، اقوام متحدہ کی جنرل اسمبلی کے صدر ڈینس فرانسس اور دیگر اعلیٰ عہدیداران نے خطاب کیا۔دریں اثنانگراں وزیراعظم انوار الحق کاکڑ نے نیویارک میں اقوام متحدہ کی جنرل اسمبلی کے 78ویں اجلاس کے موقع پر اسلامی جمہوریہ ایران کے صدر ابراہیم رئیسی سے ملاقات کی ۔صدر رئیسی سے گفتگو میں وزیر اعظم نے علاقائی رابطوں کو بڑھانےکی اہمیت پر بھی زور دیتے کہا کہ اقتصادی شعبے میں دونوں ممالک کو فروغ دینا چاہئے، ایران سے مضبوط تعلقات بنانے کیلئے پرعزم ہیں۔