وزیر اعلیٰ پنجاب کے چینی کیمونسٹ پارٹی آفس میں اہم مذاکرات ،ساہیوال ،بہاولپور اور 2 چینی شہر سسٹرز قرار

لاہور(نمائندہ خصوصی)نگران وزیراعلیٰ پنجاب محسن نقوی نے چین کے پانچ روزہ دورے کے دوران چینی صوبے ننشیاکے دارالحکومت ین چوان میں کیمونسٹ پارٹی کے سیکرٹری کے دفتر کا دورہ کیا ننشیا کیمونسٹ پارٹی کے سیکرٹری لیانگ یانشون نے باہر آکر وزیراعلی محسن نقوی اور وفد کا پرتپاک استقبال کیا وزیراعلی اور یکرٹری لیانگ یانشون کی باضابطہ ملاقات اور مذاکرات میں ننشیا کی ترقی اور ون ونڈو آپریشن کے بارے میں تبادلہ خیال کیا گیا جس میں میٹ پروڈکشن،ڈیری ڈویلپمنٹ،آئی ٹی اور ڈریپ اریگیشن سسٹم میں چین کی مہارت سے فائدہ اٹھانے پر اتفاق کیا گیا ،ساہیوال اور بہاولپور کو ننشیا کے شہروں ووزہنگ اورژانگ وی کے سسٹر شہر قرار دینے کا اصولی فیصلہ بھی کیا گیا وزیراعلی نے لیانگ یانشون کوپنجاب کے دورہ کا تحریری دعوت نامہ دیا سیکرٹری نے شکریہ ادا کرتے ہوئے دعوت قبول کر لی، ننشیا اور پنجاب کے درمیان 17سال قبل سسٹر صوبے کے معاہدے کے احیاء پر بھی اتفاق ہوا، وزیر اعلیٰ نے کہا پاکستان اور چین کی دوستی کا رشتہ اٹل ہے۔ ننشیا میں صنعتی اور زرعی ترقی کے ماڈل کامشاہدہ کررہے ہیں۔ سیکریٹری کیمونسٹ پارٹی نے کہا وزیر اعلی محسن نقوی کے کام سے متاثر ہیں۔ پنجاب کی ترقی اور عوام کی خوشحالی کے لئے تعاون سے دریغ نہیں کریں گے ، وزیراعلیٰ پنجاب چین کے شہر ین چوان کے سیاحتی مقام ہیلن مونٹین گئے۔ تھرڈ ننشیا انٹرنیشنل فرینڈ شپ سٹیزفورم کے شرکاء کے اعزاز میں ہیلن مونٹین میں عشائیہ دیاگیا ،روایتی چینی ثقافتی شو بھی پیش کیا گیا ، میزبان ننشیا کی وائس گورنر لیوجن تھیں۔وزیراعلیٰ مہمان خصوصی تھے۔وزیراعلیٰ نے شرکاء سے ثقافتی، تجارتی اور ترقیاتی امور پر تبادلہ خیال کیا ، وزیر اعلیٰ نے شدید بارش کی اطلاع پرچین سے واسا، ریسکیو 1122 اورانتظامیہ کو الرٹ رہنے کا حکم دیا،انتظامیہ اور دیگر متعلقہ افسران کو فوری طورپر فیلڈ میں پہنچنے اور نشیبی علاقوں سے پانی کےجلد از جلد نکاس کی ہدایت کی ۔