گلوبل کرکٹ کپ: پاکستان کی دلچسپ مقابلے کے بعد امریکا کو ایک وکٹ سے شکست

20 ستمبر ، 2023

لاہور (نیوزرپورٹر)اوور 40 گلوبل کرکٹ کپ میں پاکستان ویٹرینز نے یو ایس اے ویٹرینز کودلچسپ مقابلے کے بعد ایک وکٹ سے شکست دے دی۔تصور عباس کی آخری لمحات میں شاندار بیٹنگ نے پاکستان کو ممکنہ شکست سے بچا لیا، پاکستان نے 251 رنز کا ہدف 9 وکٹ پر 41 ویں اوور میں حاصل کرلیا۔یو ایس اے ویٹرینز کی جانب سے دیے گیا 251 رنز کا ہدف پاکستان نے 9 وکٹوں کے نقصان پر حاصل کیا۔آٹھویں نمبر پر آنے والے تصور عباس نے شاندار نصف سنچری اسکور کی، انہوں نے 63 گیندوں پر 87 رنز بنائے ، اس کے علاوہ پاکستان کے مصباح الحق نے 64 اور طارق ہارون نے 43 رنز بنائے۔امریکا کی جانب سے ثاقب حنیف جاں اور نثار خان نے 3، 3 وکٹیں لیں۔اس سے قبل یو ایس اے ویٹرنز نے پاکستان کے خلاف ٹاس جیت کر پہلے بیٹنگ کا فیصلہ کیا اور 44.3 اوورزمیں 250 رنزبناکرآؤٹ ہوگئی۔ یوایس اے ویٹرینز کی جانب سے محمد فرخ نے 82رنز کی اننگزکھیلی، نثارخان 39 ، انور احمد 32 اور وینود شنکر نے 31 رنزبنائے۔پاکستان ویٹرنز کی جانب سے حارث ایاز نے 4 وکٹیں حاصل کیں ،محمد سمیع ، حسن رضا،عمران علی ، کاشف صدیقی اوقر عبدالقادر نے ایک ایک وکٹ لی۔واضح رہے کہ گلوبل کپ میں 40 سے زائد عمر کے کھلاڑی شرکت کررہے ہیں ایونٹ میں پاکستان سمیت 8 ممالک کی ٹیمیں شرکت کررہی ہیں۔