اسلام امن کا مذہب، قانون ہاتھ میں لینے کی کسی کو اجازت نہیں، آرمی چیف

راولپنڈی(اے پی پی)پاک فوج کے سربراہ جنرل عاصم منیر نے اس بات زور دیا کہ اسلام امن کا مذہب ہے اور اسلام اور معاشرے میں عدم برداشت اور انتہا پسندی کی کوئی گنجائش نہیں ہے۔ مہذب معاشرے میں کسی کو قانون اپنے ہاتھ میں لینے کی اجازت نہیں دی جا سکتی۔تفصیلات کے مطابق آرمی چیف جنرل عاصم منیر سے ناظم/صدر بشپ (چرچ آف پاکستان اور بشپ آف رائیونڈ) ڈاکٹر آزاد مارشل نے مسیحی برادری کے 13 رکنی وفد کے ہمراہ یہاں جی ایچ کیو میں ملاقات کی۔ ملاقات میں مذہبی اور بین المذاہب ہم آہنگی سمیت باہمی دلچسپی کے امور پر تبادلہ خیال کیا گیا۔ آئی ایس پی آر کے مطابق آرمی چیف نے قومی ترقی میں پاکستانی کرسچن کمیونٹی کی خدمات کو سراہا اور معیاری تعلیم، صحت کی دیکھ بھال اور انسان دوست خدمات کے فروغ اور مادر وطن کے دفاع کے لیے ان کی جانب سے ادا کیے گئے شاندار کردار کو سراہا۔