نواز شریف 21 اکتوبر کو ہی واپس آئیں گے، شہباز، بیرون ملک پارٹی رہنماؤں کو واپسی کی ہدایت

لاہو(نمائندہ جنگ) مسلم لیگ (ن) کے صدر و سابق وزیر اعظم شہباز شریف نے کہا ہے کہ پارٹی قائد نواز شریف طے شدہ پروگرام کے مطابق 21 اکتوبر کو پاکستان آرہے ہیں،انشااللہ پوری قوم ان کا فقیدالمثال استقبال کرے گی۔ن لیگ نے بیرون ممالک موجود پارٹی رہنمائوں کو 3روز کے اندر وطن واپسی کی ہدایت کر دی ،مسلم لیگ (ن) نے10لاکھ کارکن لانے،کامیاب سیاسی پاور شو کیلئےتمام ڈویژنز کو ٹارگٹ سونپ دیئے گئے۔شہباز شریف نے تمام پارٹی رہنمائوں کے لئے ہدایت جاری کرتے ہوئے کہا کہ 21اکتوبر سے قبل بیرون ملک سفر نہ کریںاور اپنی تمام تر توجہ عوامی موبلائیزیشن پر دیں۔شہباز شریف نے کہا کہ قائد مسلم لیگ (ن) سے لندن میں ملاقات کے لئے تشریف لانے والے پارٹی رہنما بھی اپنے پروگرام کینسل کریں اور قائد مسلم لیگ (ن کے عظیم الشان استقبال کے لئے اپنے حلقوں میں وقت دیں۔پاکستان مسلم لیگ (ن) نے پارٹی قائد و سابق وزیراعظم نوازشریف کی وطن واپسی پر کامیاب سیاسی پاور شو کے لئے لاہور سمیت تمام ڈویژنز کو ٹارگٹ سونپ دیئے ،ذرائع کے مطابق مسلم لیگ (ن) نے 21اکتوبر کو پارٹی قائد نواز شریف کی وطن واپسی پر بھرپور سیاسی قوت کا مظاہرہ کرنے کا فیصلہ کیا ہے اور اس ضمن میں 10لاکھ کارکن لانے کے لئے تمام ڈویژنز کو ٹارگٹ بھی سونپ دیئے گئے ہیں ۔ مینار پاکستان کے گرائونڈ میں پنجاب کے تمام ڈویژنز کے الگ الگ پنڈال بنانے کا فیصلہ کر لیا گیا جس سے پارٹی رہنمائوں کی کارکردگی نمایاں ہو جائے گی۔