ورلڈکپ کیلئے پاکستانی اسکواڈ کو بھارتی ویزے جاری کردیئے گئے

کراچی (اسٹاف رپورٹر)آئی سی سی کرکٹ ورلڈ کپ میں شرکت کیلئے پاکستان کرکٹ ٹیم کو بھارتی ویزوں کے اجرا کا معاملہ حل ہوگیا، پاکستان اسکواڈ کو بھارتی ویزے جاری کردیئے گئے ہیں۔ بھارتی ہائی کمیشن کی جانب سے پیر کی رات ساڑھے دس بجے پاکستانی ٹیم کے 33؍ پاسپورٹ پی سی بی حکام کے حوالے کئے گئے۔ پی سی بی نے بھارت سے ویزے جاری نہ ہونے پر آئی سی سی کو خط تحریر کیا تھا جبکہ پاکستان سے بھارت جاکر کوریج کرنے والے صحافیوں کو آئی سی سی کی جانب سے ایکریڈیشن کی کنفرمیشن مل گئی ہے اور بھارتی کرکٹ بورڈ نے اسلام آباد میں پاکستانی ہائی کمیشن سے سفارش کی ہے کہ ان صحافیوں کو ویزے دیئے جائیں لیکن کوریئر کمپنی ویزے کی درخواستیں لینے سے انکار کررہی ہے۔ آئی سی سی کو بتایا گیا ہے کہ اس معاملے میں غیر منصفانہ طرزعمل اختیارکیا گیا ہے۔پی سی بی کا کہنا ہے کہ کے مطابق یقین دہانی کے باوجود پاکستان کے ساتھ غیر مساوی سلوک رکھا جارہا ہے جس پر ہمیں سخت تحفظات ہے، تمام صورتحال سے انٹرنیشنل کرکٹ کونسل کو آگاہ کردیا ہے جبکہ پاکستانی ٹیم کو بڑے ٹورنامنٹ سے قبل غیر یقینی صورتحال سے گزرنا پڑرہا ہے، ورلڈ کپ تیاری کی تیاری کیلئے پاکستانی ٹیم کا ٹریننگ سیشن ختم کرنے پر مجبورکیا گیا۔