ٹرمپ نے چیئرمین جوائنٹ چیفس ملی کو پھانسی دینے کا آئیڈیا دیدیا

کراچی (نیوز ڈیسک) سابق امریکی صدر ڈونلڈ ٹرمپ نے چیئرمین جوائنٹ چیفس ملی کو پھانسی دینے کا آئیڈیا دیدیا، سابق صدر ملک کے اعلیٰ ترین جنرل کے خلاف تشدد کو ہوا دینے لگے؛ امریکہ کا پریشان کن ردعمل ۔ سابق امریکی صدر اور اگلا صدر بننے کے لئے ایک سرکردہ امیدوار نے مشورہ دیا ہے کہ امریکہ کے اعلیٰ جنرل کو موت کی سزا دی جائے۔ اس غیر معمولی سزا کا کسی اور بھرپور جمہوریت میں تصور بھی نہیں کیا جا سکتا۔ لیکن ڈونلڈ ٹرمپ نے اپنے سوشل میڈیا نیٹ ورک ٹروتھ سوشل پر لکھا کہ 6 جنوری 2021 کو کیپٹل پر ہلہ بولنے کے بعد چین کو یقین دلانے کیلئے مارک ملی کی فون کال ایک ایسا عمل تھا جس کی گزرے وقتوں میں سزا موت ہوتی۔ (فون کال کی درحقیقت ٹرمپ انتظامیہ کے عہدیداروں کی جانب سے واضح طور پر منظوری دی گئی تھی۔) ملی کے خلاف ٹرمپ کی دھمکیاں دی اٹلانٹک میگزین کے چیف ایڈیٹر جیفری گولڈ برگ کی جانب سے ملی کے پروفائل کی اشاعت کے بعد سامنے آئیںجنہوں نے ان طریقوں کی تفصیلات دی تھیں جن میں ملی نے ٹرمپ سے آئین کو بچانے کی کوشش کی۔