توشہ خانہ تحائف کیس،الیکشن کمیشن کے وکیل کو تحریری جواب کیلئے 2اکتوبر تک آخری مہلت

لاہور ( این این آئی) لاہور ہائیکورٹ نے توشہ خانہ تحائف کو الیکشن کمیشن کے کاغذات میں ظاہر نہ کرنے والے سیاستدانوں کیخلاف درخواست پر الیکشن کمیشن کے وکیل کو تحریری جواب کیلئے2اکتوبر تک آخری مہلت د یتے ہوئے کہا ہے کہ عدالتوں کا مذاق بنایاہوا ہے، مہینہ ہوگیا درخواست کا جواب نہیں دیا ، آج ہی فیصلہ کرد یتے ہیں ۔گذشتہ روز ہائیکورٹ کے جسٹس راحیل کامران شیخ نے شہری تنویر سرور کی درخواست پر سماعت کی ۔ ایڈووکیٹ ندیم سرور کی وساطت سے دائر درخواست میں موقف اپنایا گیا کہ الیکشن کمیشن نے جانبداری کا مظاہرہ کیا،صرف ایک شخصیت کیخلاف کارروائی کی گئی، چیئرمین تحریک انصاف کو نااہل قرار دیا گیا، کسی دوسرے رکن اسمبلی کیخلاف شکایت درج نہیں کی گئی ،تحائف لینے اور ظاہر نہ کرنے والے اراکین اسمبلی کیخلاف یکساں کاروائی ہونی چاہیے ۔ عدالت نے جواب داخل نہ کرانے پر وکیل الیکشن کمیشن کی سرزنش اور اظہار برہمی کرتے ہوئے کہا کہ آپ نے عدالتوں کا مذاق بنایاہوا ہے، ایک مہینہ ہوگیا اس درخواست کا جواب نہیں دیا، آج ہی اس درخواست پر فیصلہ کرد یتے ہیں ۔ وکیل الیکشن کمیشن نے معذرت کرتے ہوئے استدعا کی کہ جواب داخل کرانے کیلئے مہلت دی جائے۔ عدالت نے الیکشن کمیشن وکیل کو 2 اکتوبر تک جواب کیلئے آخری مہلت دیتے ہوئے سماعت ملتوی کر دی ۔