معلوم نہیں برف پگھلی یا نہیں، جو بیگناہ ہے اسے رہائی ملنی چاہئے،شاہ محمود قریشی

اسلام آباد ( نیوز ایجنسیاں) پاکستان تحریک انصاف کے وائس چیئرمین شاہ محمود قریشی نے کہا ہےکہ معلوم نہیں برف پگھلی ہے یا نہیں لیکن جو بےگناہ ہے اسے رہائی ملنی چاہئے،40 سال سیاست کی، 39سال تک ایک پرچہ بھی نہیں ہوا ، ایک سال میں جیل اور کورٹ کچہری دیکھ لی ، دہشت گرد بھی بنا دیا گیا، شفاف انتخابات نہ ہوئے تو ملک کا ناقابل تلافی نقصان ہوگا ،عوام کا جمہوری نظام سے اعتبار اٹھ جا ئیگا، ان خیالات کا اظہار انہوں نے گزشتہ روزعدالت میں صحافیوں سے گفتگو کرتے ہوئے کیا۔ تفصیلات کے مطابق ایف آئی اے نے سائفر کیس میں شاہ محمود کو ہتھکڑی لگا کر جوڈیشل کمپلیکس اسلام آباد پہنچایا جہاں کمرۂ عدالت میں صحافیوں سے غیر رسمی گفتگو کرتے ہوئے انہوں نے کہا کہ 40 سال سیاست کی، 39 سال ایک پرچہ نہیں ہوا تھا لیکن ایک سال میں جیل اور کورٹ کچہری دیکھ لی، دہشت گرد بھی بنا دیا گیا۔ انہوں نے کہا کہ شفاف انتخابات وقت کی ضرورت اور واحد حل ہیں، اگر شفاف انتخابات نہ ہوئے تو ملک کا ناقابل تلافی نقصان ہوگا اور عوام کا موجودہ جمہوری نظام سے اعتبار اٹھ جائے گا۔