بشریٰ بی بی احتساب عدالت میں پیش ، عبوری ضمانت میں 12 اکتوبر تک توسیع

اسلام آباد(صباح نیوز) اسلام آباد کی احتساب عدالت نے توشہ خانہ کیس اور190ملین پونڈ سکینڈل میں بشریٰ بی بی کی عبوری ضمانت میں12اکتوبر تک توسیع کردی۔ اسلام آباد کی احتساب عدالت نے بشری ٰبی بی کے خلاف توشہ خانہ کیس اور190ملین پونڈ سکینڈل کیس کی سماعت کی جس سلسلے میں چیئرمین پی ٹی آئی کی اہلیہ عدالت میں پیش ہوئیں جبکہ ان کی طرف سے وکیل لطیف کھوسہ نے دلائل دئیے۔ دوران سماعت لطیف کھوسہ نے دلائل دیتے ہوئے کہا کہ نیب نے بیان دیا تھا کہ فی الحال بشریٰ بی بی کی گرفتاری مطلوب نہیں ۔ لطیف کھوسہ نے 190ملین پونڈ سکینڈل کیس میں چیئرمین پی ٹی آئی کی گرفتاری کا عدالت میں حوالہ دیا، عدالت نے بشریٰ بی بی کی گرفتاری سے قبل عدالت کو آگاہ کرنے یا نہ کرنے پر دلائل طلب کیے۔ احتساب عدالت کے جج محمد بشیر نے کہا کہ ان سے بیان لے لیتے ہیں کہ یہ بشریٰ بی بی کوگرفتار نہیں کرنا چاہتے، اس پر نیب پراسیکیوٹر نے کہا کہ اگر میرٹ پر درخواست ضمانت خارج ہوجائے تو گرفتار کیا جاسکتا ہے۔ بعد ازاں عدالت نے بشری بی بی کی دونوں مقدمات میں عبوری ضمانت میں 12 اکتوبر تک توسیع کردی۔