غیر قانونی معاشی سرگرمیوں کیخلاف ایکشن تیز کریں، آرمی چیف

راولپنڈی(اے پی پی)آرمی چیف جنرل عاصم منیر نےاس بات پر زور دیا کہ غیر قانونی معاشی سرگرمیوں کے خلاف قانون نافذ کرنے والے ادارے اور متعلقہ محکمے مل کر پوری قوت کے ساتھ کاروائیاں جاری رکھیں‘ان کارروائیوں کے نتیجے میں پاکستان کو مختلف طریقوں سے ہونے والے معاشی نقصانات سے نجات مل سکے گی۔آرمی چیف نے اپنے دورہ لاہور میں صوبائی ایپکس کمیٹی کے اجلاس میں شرکت کی۔آئی ایس پی آرکے مطابق اجلاس کے دوران آرمی چیف کو صوبے کی مجموعی سکیورٹی صورتحال، بشمول بجلی، گیس چوری، ذخیرہ اندوزی اور غیر ملکی کرنسی کی اسمگلنگ کے خلاف قانون نافذ کرنے والے اداروں کی کارروائیوں کے حوالے سے تفصیلی بریفنگ دی گئی۔ فورم نے غیر قانونی طور پر مقیم غیر ملکی شہریوں کی وطن واپسی کا بھی جائزہ لیا۔ فورم کو خصوصی سرمایہ کاری سہولت کونسل اور گرین پنجاب کے اقدامات کی پیشرفت سے بھی آگاہ کیا گیا۔ آرمی چیف نے ان تاریخی اقدامات کے سود مند اثرات کے لیے تمام متعلقہ محکموں کے درمیان ہم آہنگی کی ضرورت پر زور دیا۔