مقد مہ اندراج میں تاخیر برداشت نہیں کی جائیگی،محسن نقوی ،ایس ایچ او کو فوری ہٹانے کا حکم

لاہور (اے پی پی) نگران وزیر اعلیٰ پنجاب محسن نقوی نے کہا ہے کہ مقد مات کے اندراج میں تاخیر کسی صورت برداشت نہیں کی جائیگی۔تفصیلات کے مطابق نگران وزیر اعلیٰ پنجاب محسن نقوی نے گذشتہ رات لاہور کے تھانہ فیکٹری ایریا شیخوپورہ اور تھانہ شفیق آباد بند روڈ کا معائنہ کیا،انہوں نے تھانہ فیکٹری ایریا شیخوپورہ میں موبائل چوری و ڈکیتی کی درخواستوں پر24گھنٹے میں ایف آئی آرز کا اندراج نہ ہونے پر شدید برہمی کااظہار کیا اورایس ایچ او کو فوری طور پر عہدے سے ہٹانے کاحکم دیا اور کہاکہ مقرر ہ مدت کے اندردرخواستوں پر کارروائی کرتے ہوئے مقدمہ درج ہونا چاہئے۔ انہوں نے دونوں تھانوں میں فرنٹ ڈیسک پر شہریوں کی درخواستوں پر ی پیشرفت ، فرنٹ ڈیسک،مال خانے، محرر روم، انوسٹی گیشن روم اور دیگر شعبوں کا جائزہ لیا، سود کا کاروبار کرنے والے عناصر کیخلاف کریک ڈائون کا حکم بھی دیا،انہوں نے تھانہ شفیق آباد کے مال خانہ کو بہتر جگہ منتقل کرنے کی ہدایت بھی کی۔ حوالات میں ملزمان سے کیسز بارے پوچھا، سود کی رقم واپس نہ کرنے اور چیک باؤنس کیس کا تھانہ شفیق آباد کی حوالات میں بند ملزم اپنی داستان سناتے رو پڑا۔وزیر اعلی ٰنے دلاسہ دیا انصاف فراہم کرنے کی یقین دہانی کرائی اور ملزم کے ذمہ واجب الااد رقم ادا کرنے کا اعلان کرتے ہوئے ہدایت کی کہ رہائی کیلئے کارروائی پوری کی جائے۔ صوبائی وزیر اطلاعات عامر میر، آئی جی پنجاب اور سی سی پی او لاہور بھی ان کے ہمراہ تھے۔