فورسزکی کارروائیاں، دہشتگردوں کا سرغنہ ہلاک، لانس نائیک شہید

راولپنڈی(صباح نیوز) مردان اور پاراچنار میں سکیورٹی فورسز کی کارروائیوں کے نتیجے میں دہشت گرد ہلاک جبکہ لانس نائیک شہید ہوگئے، دہشتگرد فیصل مردان میں مارا گیا ، لانس نائیک غیر ت خان نے پارا چنار میں جام شہاد ت نوش کیا ۔ پاک فوج کے شعبہ تعلقات عامہ(آئی ایس پی آر)کے مطابق سکیورٹی فورسز نے مردان کے علاقے کاٹلنگ میں انٹیلی جنس پر مبنی آپریشن کیا۔آپریشن کے دوران دو طرفہ فائرنگ میں انتہائی مطلوب دہشت گردوں کا سرغنہ فیصل ہلاک ہوا۔ آئی ایس پی آر کے مطابق ہلاک دہشت گرد دہشت گردی کی متعدد کارروائیوں میں ملوث اور قانون نافذ کرنے والے اداروں کو انتہائی مطلوب تھا، جس کے قبضے سے اسلحہ اور گولہ بارود بھی برآمد ہوا ہے۔ ضلع کرم کے علاقے پاراچنار میں دہشت گردوں کے ساتھ ایک اور مقابلے میں سکیورٹی فورسز نے دہشت گردوں کے ٹھکانے کو موثر انداز میں نشانہ بنایا۔ فائرنگ کے دوران لانس نائیک غیرت خان نے بہادری سے لڑتے ہوئے شہادت کو قبول کیا۔آئی ایس پی آر کے مطابق پاکستان کی سکیورٹی فورسز ملک سے دہشت گردی کی لعنت کے خاتمے کے لیے پرعزم ہیں، بہادر جوانوں کی ایسی قربانیاں ہمارے عزم کو مزید مضبوط کرتی ہیں۔