عید میلاد النبی ﷺجوش و خروش کیساتھ منائی گئی ،ملک بھر میں ریلیاں، جلوس

اسلام آباد/ کراچی/ لاہور/ پشاور/ کوئٹہ/ گلگت/ ملتان ( این این آئی،سٹاف رپورٹر) ملتان سمیت ملک بھر میں عید میلاد النبیﷺ مذہبی جوش و خروش کے ساتھ منائی گئی، اس موقع پر مساجد، گھروں، گلیوں، شاہراؤں اور بازاروں کو برقی قمقموں سے سجایا گیا، مختلف علاقوں کو نعلین مبارک اور سبز پرچموں سے سجایا گیا ۔دن کا آغاز درود و سلام اور اجتماعی دعاؤں سے ہوا جس میں ملک کی سلامتی و خوشحالی کیلئے دعائیں مانگی گئیں ،مساجد،گھروں میں محافل درود کا انعقاد کیا گیا ۔ پاک فوج کی جانب سے اسلام آباد میں 31جبکہ صوبائی دارالحکومتوں میں 21، 21 توپوں کی سلامی دی گئی۔لاہور ،ملتان ،فیصل آباد، گوجرانوالہ، سرگودھا، بہاولپور، جھنگ، سیالکوٹ، حیدرآباد، سکھر، لاڑکانہ، ٹھٹہ، خیرپور، نوشہرہ، مانسہرہ، شبقدر، ایبٹ آباد، بنوں،گلگت، استور، مظفر آباد، میر پور، کوٹلی، نکیال، وادی نیلم سمیت ملک بھر میں ریلیاں اور جلوس نکالے گئے۔ عید میلاد النبیۖ کی تقریبات کو بھرپور سکیورٹی فراہم کی گئی خصوصی کنٹرول رومز قائم کیے گئے ۔