جناح ہائوس کیس، حماد اظہر، مراد سعید سمیت 9پی ٹی آئی رہنما اشتہاری قرار

لاہور (نمائندہ جنگ، ایجنسیاں) انسداد دہشت گردی عدالت کی جج عبہیر گل خان نے جناح ہاؤس حملہ کیس میں میاں اسلم اقبال، حماد اظہر، فرخ حبیب، مراد سعید، علی امین گنڈاپور، اعظم سواتی سمیت دیگر کو اشتہاری قرار دیدیا، پولیس نے رپورٹ عدالت میں پیش کی جس میں بتایا گیا کہ ملزمان کے ناقابل ضمانت وارنٹ جاری کیے گئے تھے لیکن ملزمان روپوش ہو چکے ہیں دیگر ملزمان میں زبیر خان نیازی، کرامت کھوکھر، عندلیب عباس شامل ہیں۔ عمر سرفراز چیمہ و دیگر ملزمان کے جوڈیشل ریمانڈ میں 14اکتوبر تک توسیع کردی۔ 9مئی واقعات کے 3مقدمات میں میاں محمودالرشید کی درخواست ضمانتوں پر وکلاء سے 5 اکتوبر کو دلائل طلب کر لیے۔ ڈاکٹر یاسمین راشد کی درخواست ضمانت بعد از گرفتاری پر وکلاء کو دلائل کیلئے طلب کرلیا، عسکری ٹاور کے مقدمے میں سماعت 2 اکتوبر جبکہ کنٹینر جلانے کے مقدمے میں کارروائی 5 اکتوبر کو ہوگی، ڈاکٹر یاسمین راشد کے وکیل نے موقف اختیار کیا کہ تفتیش مکمل ہوگئی ہے مزید تفتیش کی ضرورت نہیں ہے، ملزمہ جوڈیشل ریمانڈ پر جیل میں ہے، عدالت درخواست ضمانت بعداز گرفتاری منظور کرلی۔