شہبازشریف ، زرداری اور مریم نواز کا فلسطینیوں سے اظہار یکجہتی

لاہور(پی پی آ ئی،خصوصی نمائندہ ) سابق وزیراعظم شہباز شریف ، سابق صدر آصف علی زرداری اور مریم نواز نے فلسطینیوں سے اظہار یکجہتی کرتے ہوئے کہا کہ امن کیلئے فلسطینیوں پر مظالم کا خاتمہ ضروری ہے، عالمی منصف فلسطینی عوام کی حمایت میں آواز بلند کریں۔ سابق وزیراعظم شہباز شریف نے کہا ہے کہ اسرائیل پر حماس کے حملے مسجد اقصیٰ اور مقدس مقامات پر اسرائیلی کارروائیوں کا ردعمل ہے۔انہوں نے کہا کہ خطے میں امن کیلئے اسرائیل کے غیر قانونی قبضے، یہودی آباد کاری اور فلسطینیوں پر مظالم کا خاتمہ ضروری ہے، معصوم فلسطینیوں پر ظلم بند ہونا چاہیے، مسئلہ فلسطین کو فوری حل کرنا ہوگا۔علاوہ ازیں پی پی پی قیادت نے بھی فلسطینی عوام سے مکمل اظہار یکجہتی کا اعلان کیا ہے۔سابق صدر آصف زرداری نے کہا کہ طویل عرصے سے فلسطینی عوام مظالم کا سامنا کر رہے ہیں، عالمی منصف فلسطینی عوام کی حمایت میں آواز بلند کریں۔انہوں نے کہا کہ پاکستانی عوام کی ہمدردیاں اور دعائیں فلسطینی عوام کے ساتھ ہیں۔