نجکاری سے نقصان کم ہوگا،مثبت کاروباری مسابقت بڑھے گی،نگران وزیر اعظم

اسلام آباد (نمائندہ جنگ) نگران وزیر اعظم انوار الحق کاکڑ نے کہا ہے کہ نجکاری سے نقصان کم ہوگا، مثبت کاروباری مسابقت بڑھے گی،سمگلنگ اور ڈالر پر سٹے بازی کو روکنے کیلئے سخت اقدامات کئے، روپے کی بڑھتی ہوئی قدر کامیابی کا منہ بولتا ثبوت ہے، صرف غیر قانونی طور پر مقیم غیر ملکیوں کو ملک بدر کیا جا رہا ہے، 31اکتوبر کے بعدسخت کاروائی ہوگی، ان خیالات کا اظہار انہوں نے گزشتہ روز سی پی این ای کے وفد سے گفتگوکرتے ہوئے کیا۔ نگراں وزیراعظم نے وزارت اطلاعات و نشریات اور وزارت خزانہ کو ہدایت کی ہے کہ اخبارات کو درپیش تمام مسائل کو ترجیحی بنیادوں پر حل کیا جائے۔ وفد نے وزیرِ اعظم کو پاکستانی اخبارات کو درپیش مسائل سے آگاہ کیا۔وزیرِ اعظم نے وفد سے گفتگو میں کہا کہ ریاست کے خلاف منفی پرو پیگنڈے کی منظم مہم چلائی جاتی ہے۔ ا نہوں نے کہا کہ معاشرے میں مثبت بحث و مباحثے اور تنوع و اختلافِ رائے پر مبنی گفتگو سننے کے ماحول کو فروغ دینا ہوگا جس میں اخبارات کا کلیدی کردار ہے۔ وزیرِ اعظم نے کہا کہ میرے امریکہ دورے کے بارے میں جھوٹی خبروں اور بے جا تنقید کی ایک منظم مہم چلائی گئی۔ امریکہ کا دورہ مختصر ترین وفد کے ساتھ کیا۔ وزیرِ اعظم نے کہا کہ امریکہ میں موسمیاتی تبدیلی کے حوالے سے پاکستان کے کیس کو مؤثر انداز میں پیش کیا۔ اللہ رب العزت نے موقع دیا کہ موسمیاتی تبدیلی کے ثقافتی پہلو کو قرآن کا حوالہ دے کر دنیا کے سامنے پیش کیا۔ ایم ڈی عالمی مالیاتی ادارے نے اسمگلنگ اور ڈالر کی غیر قانونی خرید و فروخت کو روکنے کے حکومتی اقدامات کو سراہا۔ وزیرِ اعظم نے کہا کہ قلیل مدت میں اسمگلنگ اور ڈالر پر سٹے بازی کو روکنے کیلئے سخت اقدامات کئے۔ روپے کی ڈالر کے مقابلے میں بڑھتی ہوئی قدر اس مہم کی کامیابی کا منہ بولتا ثبوت ہے۔ وزیرِ اعظم نے کہا کہ پیٹرلیم مصنوعات کی اسمگلنگ سے ملکی معیشت کو شدید نقصان پہنچتا رہا۔ وزیرِ اعظم نے بتایا کہ بجلی چوری کو روکنے کیلئے ملک بھر میں اقدامات کئے جار ہے ہیں۔ انہوں نے کہا کہ پاکستان میں وسط ایشیائی ریاستوں سے تجارت کی اربوں ڈالر کی استعداد موجود ہے۔ وزیرِ اعظم نے کہا کہ اپنے تئیں پوری کوشش کر رہا ہوں کہ اس مختصر مدت میں ایسے اقدامات اٹھاؤں جس سے ہم اپنی تجارت کی اس استعداد کو برؤئے کار لا سکیں۔ وزیرِ اعظم نے بتایا کہ آئندہ دورہ چین میں پاک چین اسٹریٹجک تعلقات، دوطرفہ تجارت، سی پیک اور سیاحت کے فروغ پر بات ہوگی۔ گلگت بلتستان میں موجود سیاحت کی استعداد سے بھرپور فائدہ اٹھانے کیلئے منصوبے مذاکرات کا حصہ ہونگے۔. انہوں نے کہا کہ خسارے کا شکار سرکاری اداروں (SOEs) کی نجکاری کا عمل تیز اور شفاف بنا رہے ہیں۔ خسارے کا شکار سرکاری اداروں کی نجکاری سے ملکی خزانے کو ہونے والا نقصان کم ہوگا۔ نجی شعبے کی شمولیت سے مثبت کاروباری مسابقت بڑھے گی اور عوام کو بہترین سہولیات میسر ہونگی۔ انہوں نے کہا کہ افغانی ہمارے بھائی ہیں، قانونی طور پر مقیم افغان پناہ گزینوں کو کوئی واپس نہیں بھیج رہا۔ صرف غیر قانونی طور پر مقیم غیر ملکیوں کو ملک بدر کیا جا رہا ہے۔ 31 اکتوبر کے بعد انکے خلاف سخت کاروائی ہوگی۔ ملاقات میں ملک بھر سے قومی و علاقائی اخباروں کے ایڈیٹرز نے شرکت کی۔ ملاقات میں سیکریٹری اطلاعات، پرنسپل انفارمیشن آفیسر اور متعلقہ اعلی حکام بھی مو جود تھے۔