16ہزار غیر قانونی ٹیوب ویلوں کیخلاف کاروائی پر اتفاق، زرعی شعبے کی بجلی جمعے تک بحال کی جائے،وزیر اعلیٰ ڈومکی

کوئٹہ (خ ن) نگران وزیر اعلیٰ بلوچستان میر علی مردان خان ڈومکی نے کوئٹہ الیکٹرک سپلائی کمپنی کو ہدایت کی ہے کہ زرعی شعبے کے منظور شدہ قانونی ٹیوب ویلوں کی بجلی جمعہ تک بحال کر دی جائے تاکہ عین سیزن میں زمینداروں کو برقی تعطل کے باعث کسی بھی قسم کے زرعی نقصان کا سامنا نہ کرنا پڑے، نگران وزیر اعلیٰ نے سیکرٹری محکمہ انرجی اور کمشنر کوئٹہ کی سربراہی میں ایک سب کمیٹی تشکیل دیتے ہوئے کیسکو اور زمینداروں کے مابین بقایاجات کی ادائیگی ، میٹرز کی تنصیب اور غیر قانونی ٹیوب ویلوں کے خلاف کارروائی کے لیے قابل عمل تجاویز مرتب کرنے کی ہدایت بھی کی، نگران وزیر اعلیٰ میر علی مردان خان ڈومکی کی زیر صدارت کیسکو ، محکمہ خزانہ اور انتظامی افسران کا ہنگامی اجلاس ہوا جس میں نگران وزیر اطلاعات و پبلک ریلیشنز جان اچکزئی کوئٹہ الیکٹرک سپلائی کمپنی کے چیف ایگزیکٹو آفیسر عبدالکریم جمالی ، سیکرٹری خزانہ زاہد سلیم ، کمشنر کوئٹہ ڈویڑن حمزہ شفقات و دیگر حکام نے شرکت کی۔ اجلاس میں کیسکو کے سربراہ عبدالکریم جمالی نے بتایا کہ بلوچستان میں زرعی صارفین کے زمہ کیسکو کے 437 بلین جبکہ نجی صارفین کے زمہ 32 بلین روپے واجب الادا ہیں جس کی وجہ سے کیسکو کو مالی خسارے کا سامنا ہے، بلوچستان کے بی ایریا میں واجبات کی ادائیگی اور غیر قانونی کنکشن منقطع کرنے کے لئے آپریشن کا آغاز کیا جاررہا ہے اور محکمہ داخلہ کو ایف سی کی فراہمی کے لئے مراسلہ ارسال کردیا گیا ہے، سیکرٹری خزانہ زاہد سلیم نے اجلاس کو بتایا کہ گزشتہ دو مالی سال کے دوران کیسکو کو زرعی سبسڈی کے واجبات کی ادائیگی کے لئے آٹھ ارب روپے کی ادائیگی کی گئی ہے جبکہ رواں سال جون میں سرکاری واجبات کی مد میں بیاسی کروڑ روپے دئیے گئے ہیں، سیکرٹری خزانہ نے بتایا کہ مشکل مالی حالات کے باوجود زمینداروں کو نقصان سے بچانے کے لئے زرعی سبسڈی کے واجبات کی مد میں حکومت بلوچستان کیسکو کو ایک ارب روپے کی ادائیگی کے لئے تیار ہے تاہم کیسکو بھی اپنے طور پر واجبات کی وصولی کے لئے موثر اقدامات اٹھائے۔ اجلاس سے خطاب کرتے ہوئے نگران وزیر اعلیٰ میر علی مردان خان ڈومکی نے زرعی شعبے کی بجلی جمعہ تک بحال کرنے کی ہدایت جاری کرتے ہوئے عرصہ دراز سے زیر تعطل واجبات کے امور کو دونوں فریقین کی باہمی رضا مندی اور افہام و تفہیم سے حل کرنے کی ضرورت پر زور دیا ،نگران وزیر اعلیٰ نے کہا کہ عین سیزن میں بجلی کی بندش زرعی شعبے کی تباہی کا باعث ہوگی اور اس سے بلوچستان کے زمیندار معاشی بد حالی کا شکار ہوسکتے ہیں اس لیے کیسکو کل تک بجلی کی بحالی یقینی بنائے تاہم اس کے ساتھ ساتھ واجبات کی ادائیگی اور بجلی چوری کے خاتمے کے لیے ٹھوس اقدامات اٹھائے جائیں اور غیر قانونی ٹیوب ویلوں کے خلاف کارروائی عمل میں لائی جائے لیکن جو منظور شدہ قانونی ٹیوب ویلوں ہیں انہیں کم از کم آٹھ گھنٹے بجلی فراہم کی جائے تاکہ طویل برقی لوڈ شیڈنگ کے باعث کاشتہ باغات اور فصلیں تباہ نہ ہوں انہوں نے کہا کہ بی ایریا میں بجلی چوری کے تدارک کے لئے ایف سی پولیس اور لیویز کیسکو کی مدد کرے گی لیکن کیسکو بھی زمینداروں کے ساتھ ہر ممکن تعاون کرے نگران وزیر اعلیٰ میر علی مردان خان ڈومکی نے کہا کہ صارفین کے زمہ بقایاجات کی وصولی کے لئے انتظامی سطح پر پہلے بھی ہم نے تعاون کیا ہے اور آئندہ بھی کریں گے لیکن کیسکو کو بھی ادارہ جاتی اصلاح کرتے ہوئے غیر قانونی امور میں ملوث اپنے اہلکاروں کے خلاف کارروائی کرنا ہوگی اجلاس میں سولہ ہزار غیر قانونی ٹیوب ویلوں کے خلاف کارروائی پر اتفاق کیا گیا۔درایں اثناء نگران وزیراعلیٰ میر علی مردان خان ڈومکی نے کہا کہ بلوچستان میں اقلیتوں کو مثالی تحفظ حاصل ہے اور صوبے میں صدیوں سے آباد اقلیتں غم و خوشی کے لمحات میں تمام مقامی قبائل کے ساتھ برابر کی شریک رہتی ہیں ،نگران وزیراعلیٰ سے شوکت سٹیفن کی قیادت میں مسیحی برادری کے وفد نے ملاقات کی۔ وفد سے گفتگو کرتے ہوئے نگران وزیراعلیٰ نے کہا کہ اقلیتی برادری کی عبادت گاہوں کے تحفظ اور تعمیر و مرمت کے لئے بجٹ میں فنڈز مختص ہیں اور پبلک سروس کمیشن میں مشتہر ہونے والی تمام اسامیوں سمیت تمام محکموں میں اقلیتیوں کا کوٹہ مختص ہے، انہوں نے کہا کہ نگران صوبائی حکومت اقلیتوں کے مسائل کرنے کے لئے سنجیدہ ہے تاکہ صوبے میں مثالی بین المذاہب ہم آہنگی قائم رہے۔ علاوہ ازیں نگران وزیر اعلیٰ بلوچستان سے بلوچستان رورل سپورٹ پروگرام کے چیف ایگزیکٹو آفیسر ڈاکٹر طاہر رشید کی قیادت میں وفد نے ملاقات کی اور بلوچستان میں بی آر ایس پی کے جاری مختلف منصوبوں سے متعلق آگاہ کیا۔ وزیر اعلیٰ بلوچستان نے تعلیم اور صحت کے شعبوں سمیت قدرتی آفات میں بی آر ایس پی کی خدمات کو سراہتے ہوئے کہا کہ صوبائی حکومت غیر سرکاری اداروں کے معاونتی پروگرامز اور اقدامات کو قدر کی نگاہ سے دیکھتی ہے اور غیر سرکاری اداروں کو انتظامی سطح پر جہاں بھی حکومتی مدد کی ضرورت پیش آئے گی ہر ممکن تعاون کریں گے۔ بی آر ایس پی کے وفد نے نگران وزیر اعلیٰ بلوچستان میر علی مردان خان ڈومکی کو ادارے کی جانب سے سونئیر بھی پیش کیا جبکہ نگران وزیر اعلیٰ بلوچستان نے بھی بی آر ایس پی کے ایگزیکٹو آفیسر کو شیلڈ دی۔