سیاسی ڈائری،نگران وزیراعظم کی سیاسی جماعتوں کے کردار پر تبصرہ آرائی

اسلام آباد(محمد صالح ظافر/خصوصی تجزیہ نگار) نگران وزیراعظم نوارالحق کاکڑ نے سیاسی جماعتوں اور شخصیات کے کردار پر تبصرہ آرائی کے بعد آئین کے بارے میں بھی سخن سازی شروع کردی ہے وہ خودنمائی کے شوق میں بسیارگوئی کے مرتکب ہو جاتے ہیں جس سے بعض ناگفتنی سوالات اٹھنا شروع ہو جاتے ہیں وہ اپنے شجرعلمی میں ایسی گفتگو کر جاتے ہیں جو آرائشی تو ہوتی ہے لیکن اس میں وہ احتیاط جو ملک کے انتظامی سربراہ سے متقاضی ہوتی ہے اس سے تجاوز ہو جاتا ہے ان سے دریافت کیاگیا ہے کہ سب سیاسی جماعتوں کے لئے یکساں ہموار میدان موجود ہے تو اس کاجواب دیتے ہوئے انہیں دوٹوک جواب دینا تھا کہ یہ موجود ہے یا نہیں اگر نہیں تو وہ اس کے لئے کوشش کریں گے ان کا یہ کہناکہ پاکستان ایک ترقی پذیر جمہوریت ہے جہاں آئینی انصرام موجود ہے یہاں عدالتی طریق کار کی اپنی اہمیت ہے اس پر ماضی میں بھی لوگ سوالات اٹھاتے رہے ہیں اور آج بھی اٹھا رہے ہیں انہوں نے زائد ضرورت جملے ادا کرکے معاملے کو بلاوجہ متنازع بنانے کی راہ مہیا کی ہے۔ انوار کاکڑ قبل ازیں سینیٹ کے رکن تھے وہ اس حیثیت میں ایوان بالا کے دیگر ارکان کی طرح مختلف سیاسی جماعتوں کے قدآور رہنمائوں سے ملاقات کرنے کے مواقع سے استفادہ کرتے رہے ہوں گے ۔ عام انتخابات کا خوش اسلوبی سے بندوبست کرنا ہے اس حیثیت میں ان کا رابطہ تمام سیاسی جماعتوں کی قیادت سے رہنا چاہئے یہ عجب معاملہ ہے کہ اسی رابطے کا فقدان ہے۔ انہوں نے اپنے علمی برتری کا سکہ جمانے کے لئے ضروری اور غیر ضروری گفتگو سے فرصت ہی نہیں ملتی وہ کیونکر ایسی ملاقاتوں کا اہتمام کریں گے ۔