غزہ پر اسرائیل کی بدترین بمباری، عالمی ثالثی کوششیں شروع، سعودی ولی عہد اور ایرانی صدر میں تاریخی رابطہ

13 اکتوبر ، 2023

غزہ ، تل ابیب (جنگ نیوز، اے ایف پی) غزہ پر اسرائیل کی بدترین بمباری کا سلسلہ جاری ، 6روز میں فلسطینی علاقے پرکلسٹرسمیت 6ہزار سے زائد بم داغےگئے،شہر پر فضائیہ، بحریہ اور توپخانے سے چاروں اطراف سے بمباری،ہر 30سیکنڈ بعد غزہ پر ایک بم گرایا جارہا ہے ، جمعرات کو مزید 150فلسطینی شہید ہوگئے ،شہداء کی تعداد 1417ہوگئی ،غزہ کی وزارت صحت کا کہنا ہے کہ شہداء میں 450 بچے اور 250 خواتین شامل ہیں جبکہ 6ہزار سے زخمیوں میں بھی خواتین اور بچوں کی بڑی تعداد شامل ہے، مقبوضہ مغربی کنارے میں مسلح یہودی آبادکاروں نے بھی فلسطینی شہریوں پر حملے شروع کردیئے دو فلسطینی شہریوں کو فائرنگ کرکے شہید کردیا گیا، اسرائیل میں حماس کے حملوں میں ہلاک افراد کی تعداد 1300ہوگئی ہے، حماس نے سیدروت سمیت مختلف علاقوں پر راکٹ حملے کئے ہیں، اسرائیل نے شام کے دارالحکومت دمشق اور شمالی شہر حلب کے ہوائی اڈوں پر بمباری کر کے رن ویز کو نقصان پہنچایا اور فضائی سروس معطل کر دی گئی ،شامی فوج کے ذرائع نے اسرائیل کے حملوں کو چال قرار دیتے ہوئے کہا اسکے ذریعے اسرائیل دنیا کی توجہ حماس کے حملوں سے پیدا صورتحال سے ہٹانا چاہتا ہے،شام کے مقامی میڈیا کا کہنا ہے کہ حملوں کے جواب میں شامی فضائی دفاع آپریشن کا آغاز کیا گیالبنان سے متصل گائوں خالی کروادیا گیا ہے، اسرائیل نے لبنانی سرحد پر بھی مزید ہزاروں فوجی اور سازوسامان تعینات کردیا ہے، اسرائیل اور حماس کے درمیان جنگ بندی کیلئے عالمی ثالثی کی کوششیں شروع ہوگئی ہیں مصر کے بعد ترکیہ اور جنوبی افریقا نے بھی ثالثی میں کردار ادا کرنے کی پیشکش کردی ہے، سعودی ولی عہد محمد بن سلمان اور ایرانی صدر محمد رئیسی کے درمیان اسرائیل فلسطین معاملے پر تاریخی ٹیلیفونک رابطہ ہوا ہے ، ایران نے اسلامی اور عرب ممالک سے اسرائیل کیخلاف متحدہ محاذ بنانے کا مطالبہ کیا ہے،ایران اور سعودی عرب کے سرکاری میڈیا کے مطابق رئیسی اور محمد بن سلمان نے فلسطین کیخلاف جنگی جرائم کے خاتمے کی ضرورت پر تبادلہ خیال کیاسعودی ولی عہد نےاعادہ کیا کہ ریاست کشیدگی میں اضافے کو روکنے کیلئے ہر ممکن کوشش کر رہی ہے ایرانی صدر نے غزہ کی صورتحال پر شامی ہم منصب بشار الاسد اور ترک صدر رجب طیب ا یردوان کیساتھ بھی ٹیلی فونک رابطہ کیا ہےاور شامی ہم منصب سے اسرائیل کیخلاف تعاون کرنے کا کہا،تہران نے اسلامی تعاون تنظیم کے ہنگامی اجلاس کی میزبانی کی بھی پیشکش کی ہے ایرانی وزیر خارجہ حسین امیر عبد اللہیان آنیوالے دنوں میں خطے کا دورہ کرنیوالے ہیں جس میں جمعرات کو عراق اور بعد میں لبنان کا دورہ شامل ہے،انہوں نےمتحدہ عرب امارات کے ہم منصب عبداللہ بن زاید النہیان سے بھی فون پر بات کی ،امریکی وزیر خارجہ اینٹونی بلنکن نے اسرائیلی وزیراعظم نیتن یاہو سے ملاقات کے بعد کہا ہے کہ امریکا کل بھی اسرائیل کیساتھ کھڑا تھا آج بھی کھڑا ہے اور آئندہ بھی کھڑا رہے گا، نیتن یاہو کا کہنا تھا یہ وہ وقت ہے جب ہمیں حماس کیخلاف متحد ہو کر کھڑا ہونا چاہئے حماس کیساتھ داعش جیسا سلوک کیا جانا چاہئے،چینی وزارت خارجہ نے کہا کہ چین نے گزشتہ روزایک اسرائیلی اہلکار کیساتھ کال کے دوران اسرائیل اور حماس کے بڑھتے ہوئے تنازع پر گہری تشویش کا اظہار کیا۔