فرانس سے 10لاکھ پاسپورٹس کی لیمی نیشن شیٹس آئندہ ہفتے پہنچنے کا امکان

اسلام آباد ( رپورٹ:حنیف خالد) وفاقی وزارت داخلہ کو رپورٹ دی گئی ہے کہ ڈائریکٹریٹ جنرل آف پاسپورٹس اینڈ امیگریشن کو فرانس سے دس لاکھ پاسپورٹس کیلئے درکار لیمی نیشن شیٹس آئندہ ہفتے امکانی طور پر مل جائیں گی۔ اسی کے ساتھ پاکستان میں موجود 165پاسپورٹ دفاتر اور بیرون ملک 90سے زائد سفارت خانوں اور سفارتی مشنوں میں اوورسیز پاکستانیوں کی طرف سے پاسپورٹس کیلئے جو درخواستیں جمع کرائی گئی ہیں اُن پر مشین ریڈ ایبل پاسپورٹ حتی کہ الیکٹرانک پاسپورٹس کا اجراء تیزی سے شروع کر دیا جائیگا۔ لیمی ٹیشن شیٹس منگوانے کے آرڈرز پہلے سے دیئے جا چکے تھے لیکن فرانس کی کمپنی نے تاخیر سے شپمنٹ کی حالانکہ امپورٹ آرڈرز کے مطابق 10لاکھ لیمی نیشن شیٹس اُس آرڈر کے مطابق بھی ستمبر 2023ء کے اوائل میں آ جانی چاہئے تھیں لیکن ایک ہفتے سے پاسپورٹس کا اجراء رُکا ہوا تھا اور 5لاکھ پاسپورٹس کا بیک لاک ہو گیا تھا۔ اس صورتحال کے بارے میں سوشل میڈیا وغیرہ میں عجب کہانیاں شامل ہوتی رہیں‘ یہاں تک کہا گیا کہ پاکستانی پاسپورٹس کی پرنٹنگ رُک گئی ہے اور حکام نے پاسپورٹ لیمی نیشن پیپرز منگوانے میں کوتاہی کر دی ہے۔ وزارت داخلہ کو جو رپورٹ ملی ہیں اسکے مطابق پانچ لاکھ کے لگ بھگ پاسپورٹس کے اجراء میں تاخیر ہوئی ہے اور اب بیس سے پچیس ہزار پاسپورٹس کا اجراء ایک ہفتے میں اضافی طور پر جمع ہو رہا ہے۔ میڈیا میں یہ بات بھی آئی کہ دو ہفتے بعد ملنے والے پاسپورٹ دو مہینے گزرنے کے باوجود بھی نہیں مل رہے۔