کرائے کے گھر میں رہنے سے جلد بڑھاپے کا امکان

کینبرا(این این آئی)ایک منفرد تحقیق سے معلوم ہوا ہے کہ ذاتی مکان کے بجائے کرائے کے گھر میں رہنے والے افراد کی صحت پر منفی اثرات مرتب ہوتے ہیں، جس وجہ سے وہ بڑھاپے کا جلد شکار ہوجاتے ہیں۔غیرملکی خبررساں ادارے کے مطابق منفرد تحقیق سے معلوم ہوا کہ کرائے کے مکان میں رہنے والے افراد کی صحت بے روزگار اور ماضی میں سگریٹ نوشی کے عادی رہنے والے افراد کے مقابلے زیادہ تیزی سے خراب ہوتی ہے۔ آسٹریلوی ماہرین نے پایا کہ کرائے کے مکانات میں رہنے والے افراد ایسے مسائل کا زیادہ شکار ہیں، جنہیں ہر ماہ کرایہ ادا کرنے میں مشکلات کا سامنا کرنا پڑتا ہے اور ان کی عمر بڑھنے کی رفتار سب سے تیز ہوتی ہے۔ماہرین کے مطابق مذکورہ معاملے پر مزید تحقیق کی ضرورت ہے اور بڑھاپے کو قابو کرنے کے لیے ذاتی گھر کی اہمیت انتہائی اہم ہوتی ہے۔