اسلامی دنیا اسرائیل کی مصنوعات کا بائیکاٹ کرے‘ سراج الحق

اسلام آباد (نیوز رپورٹر) امیر جماعت اسلامی سراج الحق نے کہا ہے کہ اس سے پہلے کہ غزہ ملبے کا ڈھیر بن جائے اور انسانوں کے قبرستان کا منظر پیش کرے، عالم اسلام کو مظلوم فلسطینیوں کے حق میں بیانات کی بجائے عملی اقدامات کرنا ہوں گے۔ فلسطینیوں نے مجبور ہوکر مزاحمت اور جدوجہد کا راستہ اپنایا، اسرائیل غاصب اور ناجائز ریاست ہے، اسلامی دنیا اس کی مصنوعات کا بائیکاٹ کرے۔ منصورہ سے جاری بیان میں انہوں نے یورپ اور امریکہ کے انسانی حقوق سے متعلق دہرے معیار کو بھی تنقید کا نشانہ بنایا۔ امیر جماعت کی اپیل پر اتوار کو کراچی میں اقصیٰ مارچ ہوگا۔ انہوں نے اسلام آباد میں 17 اکتوبر کو فلسطین قومی کانفرنس کے انعقاد کا اعلان بھی کیا۔ سراج الحق نے سعودی عرب کی جانب سے اسرائیل سے مذاکرت معطل کرنے کی تحسین کی اور اسرائیل کو تسلیم کرنے والے اسلامی ممالک سے درخواست کی کہ وہ اپنے فیصلوں کو واپس لیں۔ سراج الحق نے اساتذہ کے وفد سے ملاقات کے دوران تعلیمی ادروں کی نجکاری کے خلاف پرامن مظاہرہ کرنے والے اساتذہ اور ملازمین پر لاہور سمیت کئی شہروں میں پولیس لاٹھی چارج، تشدد اور گرفتاریوں کی مذمت کی۔