ماحولیات سے متعلق اقوام متحدہ کی خصوصی سالانہ کانفرنس دبئی میں شروع

01 دسمبر ، 2023

برسلز (حافظ اُنیب راشد) ماحولیات سے متعلق اقوام متحدہ کی خصوصی سالانہ کانفرنس متحدہ عرب امارات کے شہر دبئی میں شروع ہوگئی۔ عالمی رہنماؤں اور70ہزار مندوبین کی شرکت کے ساتھ یہ کانفرنس12دسمبر تک جاری رہے گی۔ اقوام متحدہ کی موسمیاتی تبدیلی کی یہ کانفرنسیں (یا COPs) ہر سال منعقد ہوتی ہیں اور یہ دنیا کا واحد کثیر جہتی فیصلہ ساز فورم ہے، جو دنیا کے ہر ملک کی تقریباً مکمل رکنیت کے ساتھ موسمیاتی تبدیلی پر فیصلہ سازی کرتا ہے۔ اس کانفرنس میں دنیا ماحولیاتی بحران سے نمٹنے کے طریقوں پر متفق ہونے کے لئے اکٹھی ہوتی ہے، جیسے عالمی درجہ حرارت میں اضافے کو 1.5 ڈگری سیلسیس تک محدود کرنا، کمزور کمیونٹیز کو موسمیاتی تبدیلی کے اثرات سے ہم آہنگ ہونے میں مدد کرنا اور 2050 تک کاربن کے اخراج کو صفر تک محدود کرنا شامل ہیں۔ اس سال منعقد کوپ 28 میں 70,000 سے زیادہ مندوبین کی شرکت متوقع ہے، بشمول اقوام متحدہ کے فریم ورک کنونشن آن کلائمیٹ چینج (UNFCCC) کے رکن ممالک کے جبکہ دیگر شرکاء میں کاروباری رہنما، نوجوان، موسمیاتی سائنس دان، متاثرہ مقامات پر رہنے والی انڈیجینس کمیونٹیز، صحافی اور مختلف دیگر ماہرین اور اسٹیک ہولڈرز بھی شرکاء میں شامل ہیں۔ علاوہ ازیں یورپین یونین کی جانب سے کمیشن کی صدر ارسلا واندرلین کے علاوہ 6 ای یو کمشنرز بھی ان اجلاسوں میں شریک ہوں گے۔