تحریک انصاف کے 42 کارکنوں کی ضمانت منظور ، رہا کرنے کا حکم

01 دسمبر ، 2023

سوات،لاہور (صباح نیوز) سوات کی انسداد دہشتگردی عدالت نے تحریک انصاف کے 42کارکنان کی ضمانت منظور کرتے ہوئے رہا کرنے کا حکم دے دیا، ملزمان کے خلاف دہشتگردی کے تحت مقدمات درج تھے۔سوات کی انسداد دہشتگردی عدالت میں دہشتگردی کے مقدمات کے خلاف تحریک انصاف کے کارکنان کی درخواستوں پر سماعت ہوئی۔پی ٹی آئی کی جانب سے سہیل سلطان ایڈووکیٹ عدالت میں پیش ہوئے۔ عدالت نے پی ٹی آئی کے42کارکنان کی ضمانت منظور کرلی اور تمام گرفتار کارکنان کی رہائی کا حکم دے دیا۔ دوسری جانب انسداد دہشت گردی عدالت لاہور نے جناح ہاؤس حملہ کیس میں نامزد 112ملزمان کے مقدمے کا ریکارڈ طلب کر لیا۔دوران سماعت پراسیکیوشن نے موقف اپنایا کہ مقدمے کا ریکارڈ ہائیکورٹ میں ہے جس پر عدالت نے اگلی سماعت پر ریکارڈ پیش کرنے کا حکم دیتے ہوئے کیس کی مزید سماعت 4 دسمبر تک ملتوی کر دی۔ واضح رہے کہ 9 اور 10 مئی واقعات کے بعد ان کارکنوں کو فوٹیجز شواہد کی بنا پر گرفتار کیا گیا تھا۔