توہین الیکشن کمیشن،عمران خان،اسد عمر ،فواد چوہدری پر فرد جرم عائد نہ ہو سکی

01 دسمبر ، 2023

اسلام آباد (صباح نیوز) الیکشن کمیشن اور چیف الیکشن کمشنر کی توہین کے کیس میں چیئرمین پی ٹی آئی ،سابق وفاقی وزیر اسد عمر اور فواد چوہدری پر فرد جرم عائد نہ ہو سکی ۔چیئرمین پی ٹی آئی، اسد عمر، فواد چوہدری پر الیکشن کمیشن اور چیف الیکشن کمشنر کی توہین کے کیس کی سماعت ہوئی۔ممبر نثار درانی کی سربراہی میں4رکنی بینچ نے سماعت کی۔فواد چوہدری کے وکیل فیصل چوہدری اور چیئرمین پی ٹی آئی، اسد عمر کے وکیل شعیب شاہین کمیشن کے سامنے پیش ہوئے۔وکیل شعیب شاہین نے کہا کہ ہمیں الیکشن کمیشن کی چیئرمین پی ٹی آئی سے متعلق آرڈر کی کاپی نہیں ملی۔ ممبر کمیشن نے کہا کہ وزارت قانون کی رپورٹ ہے کہ حالات ایسے نہیں کہ چیئرمین پی ٹی آئی کو پیش کیا جائے، کمیشن کو کہا گیا ہے کہ وہ جیل میں سماعت کے لیے جا سکتے ہیں۔ چیئرمین پی ٹی آئی کے وکیل شعیب شاہین نے کہا کہ ہم تو دلائل دینا چاہتے ہیں، کوئی رپورٹ خفیہ نہیں ہے تو وہ اب پبلک کریں، بصورت دیگر آپ رپورٹ وکیل کو تو دیں، کوئی رپورٹ ہمارے خلاف استعمال ہونی ہے، اگر جیل ٹرائل ہونا ہے تو پھر سارا ٹرائل وہاں ہو گا، ہم نے درخواست دی لیکن ہمیں کاپی نہیں ملی۔ممبر کمیشن نے کہا کہ اگر خفیہ نہیں تو ہم آپ کو رپورٹ کی کاپی دیتے ہیں، آپ کیس لڑنا بھی چاہتے ہیں اور کیس کو آگے بڑھاتے بھی نہیں، ایک سال سے زیادہ ہو گیا کیس کو، چارج فریم کرنا ہے وہ کہیں بھی کر سکتے ہیں، مسئلہ چارج فریم کا ہے۔چیئرمین پی ٹی آئی کے وکیل شعیب شاہین نے کہا کہ آپ کیس کو ڈراپ کر دیں۔ ممبر کمیشن نے کہا کہ کیس ڈراپ کرنے کا بھی ایک طریقہ ہوتا ہے، ایک سال سے زیادہ ہو گیا ہے، ہم دوسرے کاموں میں بھی الجھے ہیں۔ وکیل شعیب شاہین نے کہا کہ وکلاء کو ملاقات کی اجازت نہیں۔جس پر ممبر کمیشن نے کہا کہ ہم نے پروڈکشن آرڈر جاری کیا تھا۔وکیل شعیب شاہین نے کہا کہ لیکن آپ کے آرڈر پر عمل درآمد نہیں ہوا۔ممبر کمیشن نے کہا کہ ہمارے پاس اپنی فورس ہوتی تو بہت کچھ کرتے، یہ رسک ہم کیوں اٹھائیں؟وکیل شعیب شاہین نے کہا کہ چیئرمین پی ٹی آئی کو جان بوجھ کر لانا نہیں چاہتے۔ممبر کمیشن نے کہا کہ پہلے آپ جان بوجھ کر پیش نہیں ہونا چاہتے تھے۔ ممبر الیکشن کمیشن نے اسد عمر سے مکالمہ کرتے ہوئے کہا کہ کبھی آپ نہیں آتے کبھی وکیل نہیں آتا۔اسد عمر نے کہا کہ میں تو سیاست بھی چھوڑ چکا ہوں۔ اسد عمر نے بیان الیکشن کمیشن میں جمع کرا دیا۔ممبر کمیشن نے کہا کہ اسد عمر کے معاملے پر آرڈر کرتے ہیں۔توہین الیکشن کمیشن و الیکشن کمشنر کیسز کی سماعت 6 دسمبر تک ملتوی کر دی گئی۔