دہشتگردوں کے معاملے پرافغانستان ڈبل گیم کر رہا ہے ، جان اچکزئی

کوئٹہ(صباح نیوز)نگران وزیر اطلاعات بلوچستان جان اچکزئی نے کہا ہے کہ دہشتگردوں کے معاملے پر افغانستان پاکستان کے ساتھ ڈبل گیم کر رہا ہے ، پاکستان کی اب بس ہوگئی، کوئی بھی افغانستان سے بذریعہ چمن بغیر پاسپورٹ کے ملک میں داخل نہیں ہوسکتا۔کوئٹہ میں پریس کانفرنس کرتے ہوئے جان اچکزئی نے کہا کہ پاکستان افغانستان سے دہشت گردوں کی حوالگی کا مطالبہ کر رہا ہے مگر افغانستان پاکستان کے ساتھ ڈبل گیم کر رہا ہے۔انہوں نے کہا کہ پاکستان دہشت گردوں کے خاتمے کے لیے ہر ممکن اقدام کرے گا، ریاست پاکستان اپنے مفادات کے لیے ہر حد تک جائے گی۔نگران صوبائی کا کہنا تھا کہ بنوں میں دہشت گردی افغانستان کے شہری نے کی، افغان تذکرہ رکھنے والے سیکورٹی رسک بن چکے ہیں، لہٰذا پاسپورٹ کے بغیرکسی کو پاکستان میں داخلے کی اجازت نہیں۔جان اچکزئی نے کہا کہ پی ٹی ایم نے چمن دھرنا یرغمال بنالیا ہے، دہشت گردوں اور ان کے سہولت کاروں کو نہیں چھوڑا جائے گا کیونکہ کوئی بھی ریاست دہشت گردی کی اجازت نہیں دے سکتی۔بلوچستان کو غیر قانونی تارکین وطن سے پاک کیا جائے گا۔