امریکی نمائندہ خصوصی برائے افغانستان تھامس ویسٹ اگلے ہفتے پاکستان کا دورہ کرینگے

اسلام آباد (نامہ نگار خصوصی) مصدقہ ذرائع سے معلوم ہوا ہے کہ افغانستان کی صورتحال بالخصوص اسلام آباد اور کابل کے درمیان تعلقات اور پاکستان کی جانب سے افغان شہریوں کو ان کے ملک واپس بھیجنے کے حوالے سمیت دیگر امور پر مذاکرات کیلئے امریکی نمائندہ خصوصی برائے افغانستان تھامس ویسٹ اگلے ہفتے پاکستان کا دورہ کریں گے ایک اعلیٰ سطحی وفد بھی ان کے ہمراہ ہوگا۔ اسلام آباد میں سفارتی ذرائع کے مطابق دونوں ممالک کے اعلیٰ سطحی وفود کے درمیان اہم ملاقات ہوگی جس میں امریکا جانے والے پاکستان میں مقیم 25 ہزار افغان باشندوں کا معاملہ زیربحث آئیگا جبکہ پاکستان میں غیر قانونی مہاجرین کے انخلاء پر بھی تبادلہ خیال ہوگا۔ اس کے علاوہ ملاقات میں پاکستان کے خلاف دہشت گردی، افغان سرزمین استعمال ہونے پر گفتگو، کالعدم تحریک طالبان پاکستان (ٹی ٹی پی) اور دیگر دہشت گرد تنظیموں کےخاتمے کی حکمت عملی پرمشاورت کی جائیگی ۔