پنجاب میں موٹر سائیکل رکشہ بند کرنے کا فیصلہ، ڈرائیورز کو 30 روز کی مہلت

لاہور(اپنے نامہ نگار سے) نگراں وزیر ٹرانسپورٹپنجاب ابراہیم مراد کی ہدایت پر محکمہ ٹرانسپورٹ پنجاب حکومت کی جانب سے موٹر سائیکل رکشہ بند کروانے کا فیصلہ کیا گیا ہے۔ابراہیم مراد نے کہا کہ چنگ چی رکشوں کو 30 دن کی وارننگ دی گئی جب کہ لوڈر رکشہ بنانے والوں کے خلاف بھی کریک ڈائون کا آغاز کردیا ہے۔نگراں وزیر نے کہا کہ غیرمنظور شدہ رکشوں کو پہلے بڑے شہروں میں بند کیا جائے گا، دوسرے مرحلہ میں چھوٹے شہروں اور دیہی علاقوں میں کریک ڈائون ہوگا، البتہ موٹر سائیکل رکشے کی آئندہ مینوفیکچرنگ پر پابندی ہوگی۔سرکاری اعداد و شمار کے مطابق اس وقت صرف لاہور شہر میں 80 ہزار سے زائد موٹر سائیکل رکشے چل رہے ہیں جن میں سے صرف 20 فیصد رجسٹرڈ ہیں۔واضح رہے کہ گزشتہ دنوں چیف سیکرٹری پنجاب اختر زمان کا میڈیا سے گفتگو میں کہنا تھا کہ موٹر سائیکل رکشہ بند کروانے کا اصولی فیصلہ ہوچکا ہے، اس کی 900 غیر قانونی ورک شاپس ہیں، نیا موٹر سائیکل رکشہ بنے گا اور نہ ہی وہ مارکیٹ میں آئے گا۔انہوں نے مزید کہا کہ پنجاب میں اسموگ سے نمٹنے کے لیے مصنوعی بارش کے دو منصوبے زیر غور ہیں تاہم ورلڈ بینک حکام ان منصوبوں سے متفق نہیں ہیں۔