چین نے اسد اللہ بلال کریمی کو باضابطہ طور پرافغان سفیر تسلیم کر لیا

اسلام آباد (نامہ نگار خصوصی) طالبان حکومت کے اعلان کے مطابق چین نے افغانستان کی طالبان حکومت کی جانب سے نامزد کردہ اسد اللہ بلال کریمی کو باضابطہ طور پر سفیر تسلیم کر لیا ہے۔ طالبان وزارت خارجہ کے ایک سرکاری بیان کے مطابق چینی وزارت خارجہ کے پروٹوکول ڈیپارٹمنٹ کے ڈائریکٹر جنرل ہانگ لی نے طالبان حکومت کے سفیر اسد اللہ بلال کریمی کی اسناد سفارت قبول کر لی ہیں جس کی تصویر بھی جاری کردی گئی ہے۔ بیان میں اس سفارتی عمل کو بیجنگ اور کابل کے درمیان مثبت تعلقات کے مزید استحکام اور توسیع میں اہم قرار دیا گیا ہے۔ اسد اللہ بلال کریمی طالبان کی قیادت میں کام کرنیوالی وزارت اطلاعات میں نائب ترجمان کی حیثیت سے فرائض انجام دے چکے ہیں جو چین میں اپنی سفارتی ذمہ داریاں سنبھالنے کیلئے بیجنگ پہنچ چکے ہیں۔ اس طرح 2021 میں اقتدار سنبھالنے کے بعد کسی بھی ملک میں وہ طالبان حکومت کے پہلے سرکاری طور پر تسلیم شدہ سفیر ہوں گے۔