ترقی یافتہ ممالک موسمیاتی تبدیلی سے نمٹنے کی کوششوں کو آگے بڑھائیں، پاکستان

اسلام آباد (نامہ نگار خصوصی) پاکستان نے ترقی یافتہ ملکوں سے مطالبہ کیا ہے کہ وہ ماحولیاتی اثرات میں کمی سمیت موسمیاتی تبدیلی سے نمٹنے کے اقدامات کی کوششوں کو آگے بڑھائیں۔ یہ مطالبہ وزیرخارجہ جلیل عباس جیلانی نے دبئی میں جاری کوپ۔ 28 عالمی موسمیاتی کانفرنس کے دوران موسمیاتی تبدیلی کے حوالے سے G-77 اور چینی رہنمائوں کی کانفرنس میں پاکستان کی نمائندگی کرتے ہوئے کیا۔ وزیرخارجہ نے ترقی پذیر ملکوں کیلئے موسمیاتی تبدیلی سے نمٹنے کیلئے مالی امداد اور اس سے محفوظ عمارتوں پر زیادہ توجہ مرکوز کرنے پر زور دیا۔انہوں نے کہاکہ موسمیاتی تبدیلی سے نمٹنے کے وعدوں پر موثر عملدرآمد کے لئے تمام ممالک حصہ دار ہیں۔وزیرخارجہ نے موسمیاتی تبدیلی کے تمام شعبوں میں جی۔77 کے اغراض ومقاصد کے حصول کیلئے یکجہتی کی ضرورت پر زور دیا جن میں موسمیاتی اثرات میں کمی، ماحولیاتی مطابقت، نقصانات کے ازالے اور مالیاتی فنڈ شامل ہیں۔