فلسطینیوں پر مظالم، برطانیہ و دیگرممالک میں مظاہرے،جنگ بندی کا مطالبہ

لندن(این این آئی) غاصب صہیونی ریاست اسرائیل کے مظلوم فلسطینیوں پر مظالم کے خلاف دنیا بھر میں آواز بلند کی جا رہی ہے۔غیرملکی خبررساں ادارے کے مطابق اب برطانوی بھی گھروں سے نکل آئے اور انہوں نے لندن کی ٹھٹھراتی سردی اور بارش کی پروا کیے بغیر غزہ میں جنگ بندی کے لیے احتجاجی مظاہرہ کیا جس میں جمائما خان نے بھی شرکت کی۔اس مظاہرے میں مسلمانوں کے علاوہ یہودی مذہبی رہنما بھی پیش پیش رہے اور انسانیت کی بقا کی خاطر غزہ میں فوری جنگ بندی کا مطالبہ کیا۔بریڈ فورڈ میں مظاہرین نے ڈھول بجاکر اقوام عالم کو جگانے کی کوشش کی۔سکاٹ لینڈ میں بھی لوگوں نے اسرائیل سے غزہ پر حملے بند کرنے کا مطالبہ کیا۔ یمن میں ہزاروں فلسطینی پرچم لہرائے گئے۔ پیرس میں ہزاروں افراد نکل آئے۔ جکارتہ میں لاکھوں افراد فلسطینیوں کیلئے سڑکوں پرنکلے۔ اسرائیل کیخلاف نعرے بازی کی اور بمباری بند کرنے کا مطالبہ کیا۔