احتساب عدالت نے 190ملین پاؤنڈ ریفرنس کی سماعت کا تحریری حکم نامہ جاری کر دیا

لاہور (نمائندہ جنگ) احتساب عدالت نے 190 ملین پاؤنڈ ریفرنس میں سماعت کا تحریری حکم نامہ جاری کر دیا۔احتساب عدالت کے جج محمد بشیر نے اڈیالہ جیل میں سماعت کا تحریری حکم نامہ جاری کیا، حکم نامہ میں کہا گیا سابق چیئرمین پی ٹی آئی جوڈیشل لاک اپ پر اڈیالہ جیل میں ہیں، سابق چیئرمین پی ٹی آئی کو ایک کریمنل کیس میں دوسری عدالت میں پیش کیا گیا۔حکم نامہ میں کہا گیا کریمنل کیس میں سماعت جاری ہونے کی وجہ سے سابق چیئرمین پی ٹی آئی کو عدالت میں پیش نہ کیا جا سکا، اڈیالہ جیل حکام آئندہ سماعت پر سابق چیئرمین پی ٹی آئی کو عدالت میں پیش کریں گے، ریفرنس کے مفرور چار شریک ملزموں کے ناقابل ضمانت وارنٹ گرفتاری جاری ہیں۔حکم نامہ میں مزید کہا گیا شریک ملزمہ بشریٰ بی بی عبوری ضمانت پر ہیں، آئندہ سماعت کل کی جائے گی۔