الیکشن کمیشن کو مختص انتخابی فنڈز جلدجاری ہوں گے،سیکرٹری خزانہ

راولپنڈی ،اسلام آباد (مانیٹرنگ ڈیسک،صباح نیوز)سیکرٹری خزانہ امداداللہ بوسال کا کہنا ہے کہ الیکشن کمیشن کو دو دن میں مختص انتخابی فنڈز جاری کر دیے جائیں گے۔الیکشن کمیشن نے فروری2024میں ہونے والے عام انتخابات کے لیے مختص فنڈز ریلیز نہ ہونے کے معاملے کا نوٹس لیتے ہوئے سیکرٹری وزارت خزانہ کو طلب کیا تھا۔فنڈز کی ریلیز نہ ہونے کا معاملہ سامنے آنے کے بعد سیکرٹری وزارت خزانہ امداداللہ بوسال الیکشن کمیشن کے حکام سے ملاقات کیلئے پہنچے۔سیکرٹری خزانہ امداداللہ بوسال کا الیکشن کمیشن حکام سے ملاقات کے بعد میڈیا سے گفتگو کرتے ہوئے کہنا تھا الیکشن کمیشن کی طرف سے 14 نومبر کو فنڈز کی فراہمی کیلئے خط لکھا گیا جو 18 نومبر کو وزارت خزانہ کو موصول ہوا۔ان کا کہنا تھا فنڈز کے اجرا کیلئے مختلف سطح سے منظوری ضروری ہوتی ہے، اگلے دو دن میں الیکشن کمیشن کے مطلوبہ فنڈز جاری کردیئے جائیں گے۔سیکرٹری وزارت خزانہ کا کہنا تھا ہم الیکشن کمیشن کو جتنی ضرورت ہے وہ فنڈز جاری کر دیں گے۔