MQMاب ن لیگ کے ہاتھوں استعمال ہونے جارہی ہے، سعید غنی

کراچی (پی پی آئی)پیپلزپارٹی کے رہنما سعید غنی نے کہا کہ اب ایم کیو ایم مسلم لیگ ن کے ہاتھوں استعمال ہونے جارہی ہے،پہلے بھی بہت سی جماعتوں کے ہاتھوں استعمال ہوئی ،ایم کیو ایم انتخابات میں مقابلہ کرے، دھمکی ، دادا گیری مناسب نہیں ۔ ان خیالات کا اظہار انہوں نے گزشتہ روز پریس کانفرنس کرتے ہوئے کیا۔ سعید غنی نے کہا کہ ایم کیو ایم انتخابات میں مقابلہ کرے، دھمکی اور دادا گیری کا طرز عمل کسی طور پرمناسب نہیں، نگراں حکومتیں بنیں توسندھ میں بیٹھا ہرسرکاری افسرتبدیل ہوا ہے۔انہوں نے کہا کہ ایسا کوئی افسر نہیں رہا اپنی سیٹ پر، جو پی پی حکومت میں تھا، تمام افسران کی تبدیلی ہوئی یہ صرف صوبہ سندھ میں ہوا، مصطفیٰٰ کمال کے دھمکی آمیز رویے کا اداروں کو نوٹس لینا چاہئے۔رہنما پیپلزپارٹی نے کہا کہ ہم تو لوگوں کوجوڑنے کی بات کرتے ہیں، ایم کیوایم ہمیشہ بہت ساری جماعتوں کے ہاتھوں استعمال ہوئی ہے، اب ایم کیو ایم مسلم لیگ ن کے ہاتھوں استعمال ہونے جارہی ہے۔