یقین ہے 8 فروری کو الیکشن ہونگے، فی الحال عمران لڑنے کی پوزیشن میں ہیں، نگراں وزیراعظم

اسلام آباد (اے پی پی، مانیٹرنگ ڈیسک) نگران وزیراعظم انوار الحق کاکڑ نے کہا ہے کہ یقین ہے 8 فروری کو عام انتخابات ہونگے، اس حوالے سے شکوک وشبہات نہیں ہونے چاہئیں،فی الحال سابق وزیراعظم عمران خان انتخاب لڑنے کی پوزیشن میں ہیں ، 9 مئی کے بعد ریاستی جبر کاکوئی ثبوت سامنے نہیں آیا، یہ محض الزام ہے، محدود مینڈیٹ میں رہتے ہوئے نگران حکومت قومی معیشت بہتر بنانے کیلئے جو ممکن ہے ، وہ کر رہی ہے، باقی کام آئندہ حکومت کریگی،انتخابات میں سیکورٹی کیلئے فوج کی تعیناتی کا مطالبہ آیا تو غور کرینگے، سیاستدانوں کو سول ۔ ملٹری تعلقات کی بہتری کے گر بتا نہیں سکتا،آنے والی حکومت 18ویں ترمیم پر غور کر سکتی ہے۔ان خیالات کاا ظہار انہوں نےایک خصوصی انٹرویو میں کیا۔ سابق وزیراعظم عمران خان اور انکی جماعت کے انتخابات میں حصہ لینے پر پابندی کے حوالے سے سوال کے جواب میں وزیراعظم نے کہا کہ ابھی تک ان پر کوئی قدغن نہیں ہے۔ مستقبل میں کیاصورتحال ہو گی اس بارے وہ ابھی کچھ نہیں کہہ سکتے۔ پی ٹی آئی رہنمائوں کی مبینہ گمشدگیوں، منظر عام پر آنے اور سیاست چھوڑنے کے اعلانات کے حوالے سے سوال کے جواب میں نگران وزیراعظم نے کہا کہ 9 مئی کو ریاستی اداروں پر حملے ہوئے جسکے بعد کئی لوگ روپوش ہو گئے ، اس روپوشی کے دوران کسی سوچ بچار کے نتیجے میں پی ٹی آئی یا سیاست سے کنارہ کشی اختیار کرنا، ان افراد کا ذاتی فیصلہ ہے۔ وزیراعظم نے لیول پلیئنگ فیلڈ نہ ہونے کے الزامات کو بھی مسترد کیا۔ پی آئی اے کی نجکاری کے پیچھے مخصوص عناصر کے ہونے سے متعلق سوال پر وزیراعظم نے کہا کہ یہ سازشی مفروضے ہیں جن کی وجہ سے ملک اس نہج پر پہنچ گیا ہے۔ غزہ پر اسرائیلی جارحیت کے حوالے سے سوال کے جواب میں وزیراعظم نے کہا کہ پاکستان فوری فائر بندی اور انسانی راہداری کھلوانے کی کوشش کر رہا ہے، اگر دنیا، او آئی سی اور دیگر ممالک کے ساتھ کھڑی ہوتی تو اسرائیل پر دبائو بڑھایا جا سکتا تھا۔وزیراعظم نے کہا کہ ٹی ٹی پی کے حوالے سے ہماری پالیسی واضح ہے، ہم اسے سماج اور ریاست دشمن سمجھتے ہیں اور اپنی ریاست کی بقاء کیلئے آخری حد تک لڑینگے،غائب رہنے یا چلہ کاٹنے والے سیاستدان خود بتائیں وہ کیوں چلے پر گئے، غیر رجسٹرڈ افغان شہریوں کی واپسی ہمارا اندرونی معاملہ ہے۔