سویلین کے ملٹری کورٹ ٹرائل سے متعلق انٹرا کورٹ اپیلیں سماعت کیلئے مقرر

اسلام آباد (خبر نگار) 9مئی کی دہشتگردی میں ملوث سویلین ملزمان کا ٹرائل فوجی عدالتوں میں کرنے سے متعلق سپریم کورٹ کے 23 اکتوبر کے فیصلے کے خلاف انٹرا کورٹ اپیلیں سماعت کے لئے مقرر کر دی گئی ہیں۔ جسٹس سردار طارق مسعود کی سربراہی میں 6رکنی لارجر بنچ بدھ کو کیس کی سماعت کرے گا، جسٹس سردار طارق مسعود کی سربراہی میں جسٹس امین الدین خان ، جسٹس محمد علی مظہر ، جسٹس سید حسن اظہر رضوی، جسٹس مسرت ہلالی اور جسٹس عرفان سعادت خان پر مشتمل 6رکنی لارجر بنچ 13 دسمبر کو کیس کی سماعت کرے گا۔ یاد رہے کہ جسٹس اعجاز الاحسن کی سربراہی میں قائم پانچ رکنی بنچ نے 23اکتوبر کو اس حوالے سے دائر کی گئی آئینی درخواستوں کا فیصلہ جاری کرتے ہوئے قرار دیا تھا کہ 9مئی کے فسادات میں ملوث ملزمان کے مقدمات فوجی عدالتوں میں نہیں بلکہ عام یا خصوصی قانون کے تحت قائم مجاز دائرہ اختیار کی حامل فوجداری عدالتوں میں ہی چلائے جائیں گے۔ تاہم اس فیصلے کے خلاف وفاقی حکومت ، وزارت دفاع، حکومت پنجاب ، خیبر پختونخوا اور بلوچستان نے یہ انٹرا کورٹ اپیلیں دائر کی تھیں۔