افغانستان کو انسانی امداد کیلئے ادارہ جاتی طریقہ کار وضع کیا جائے،آرمی چیف

اسلام آباد ( وقائع نگار )چیف آف آرمی سٹاف جنرل قمر جاوید باجوہ سے جی ایچ کیو میں سیکرٹری جنرل آف ڈیفنس اینڈ نیشنل آرمامنٹ ڈائریکٹر اٹلی لیفٹیننٹ جنرل لوسیانو پورٹولانو نے ملاقات کی ،ملاقات کے دوران باہمی دلچسپی کے امور، افغانستان کی حالیہ پیشرفت سمیت علاقائی سلامتی کی صورتحال بالخصوص تربیت اور انسداد دہشتگردی کے شعبوں میں فوجی تعاون بڑھانے کے حوالے سے تبادلہ خیال کیا گیا،آرمی چیف نےاس موقع پر کہا کہ پاکستان عالمی اور علاقائی معاملات میں اٹلی کے کردار کو قدر کی نگاہ سے دیکھتا ہے، ہم اپنے دوطرفہ تعلقات کو بڑھانے کے خواہاں ہیں، جنرل قمر جاوید باجوہ نے انسانی ہمدردی کی تباہی کو روکنے کیلئے افغانستان کو انسانی امداد پہنچانے کیلئے فوری طور پر ادارہ جاتی طریقہ کار وضع کرنے کی فوری ضرورت پر بھی زور دیا، انہوں نے زور دیکر کہا کہ افغانستان میں امن کا مطلب پاکستان میں امن ہے،مہمان نے پاکستان کی مسلح افواج کی پیشہ ورانہ مہارت کا اعتراف کیا اور مختلف شعبوں میں تعاون بڑھانے کے عزم کا اظہار کیا، انہوں نے افغان صورتحال میں پاکستان کے کردار، بارڈر مینجمنٹ کیلئے خصوصی کوششوں اور علاقائی استحکام میں کردار کو بھی سراہا۔