گیس بحران، لاہور میں لوڈشیڈنگ سے چولہےگیزر بند، سردی سے بچے بیمار بندش سے بھوکے رہنے پر مجبورشہری بلبلا اٹھے،کہیں لوڈشیڈنگ نہیں ہورہی، ترجمان سوئی ناردرن

لاہور(سپیشل رپورٹر)سرما کی سرد لہر کے دوران لاہور سمیت کئی شہروں میں گیس بحران جاری، صوبائی دارالحکومت کے مختلف علاقوں میں گیس لوڈ شیڈنگ سے گھروں کے چولہے ٹھنڈے، گیزر بھی بند ہو گئے۔ سکول جانیوالے بچے صبح سویرے ٹھنڈے پانی کے استعمال سے بیمارہونے لگے۔شہری بلبلا اٹھے۔متاثرہ صارفین نے کہا کہ گیس بند ہونے کی وجہ سے ناشتہ بھی تیار نہیں ہوتا، دوپہر اور رات کو کھانا پکانا بھی مشکل ہو گیا،آدھی رات کو گیس بحال ہوتی ہے صبح سویرے دوبارہ غائب ہو جاتی ہے، گیس بند ہونے کی وجہ سےبھوکے رہنے پر مجبور ہوگئے ہیں، ہوٹلوں پر ایل پی جی استعمال ہورہی ہے جس سے کھانے کی قیمتوں میں اضافہ ہو گیا ہے، ایل پی جی کی قیمتیں بڑھ چکی ہیں جس وجہ سے گھروں میں لکڑیاں جلانے پر مجبور ہیں، حکومت فی الفور گیس لوڈ شیڈنگ ختم کرے اور گھروں میں گیس کی سپلائی بحال کی جائے۔ سوئی ناردرن گیس پائپ لائنز کے ترجمان نے کہا کہ گیس پریشر میں کمی کی وجہ سے صارفین کو پریشانی ہے، صارفین کی شکایات نمٹانے کے لئے 500سے زائد شکایات ٹیمیں بنادی ہیں،کہیں گیس کی لوڈ شیڈنگ نہیں ہو رہی۔ بعض جگہوں پر کمپریسر کی وجہ سے انفرادی شکایات ہیں جس کے لئے صارفین ہیلپ لائن نمبر پر شکایت درج کرا سکتے ہیں۔