عوامی مینڈیٹ کا احترام ،اتحاد نہیں کریں گے، متنازع حلقوں میں دوبارہ گنتی نہیں ہوئی تو اپوزیشن میں بیٹھیں گے، تحریک انصاف

اسلام آباد (نمائندہ جنگ)تحریک انصاف کے سینئر رہنما بیرسٹر گوہر علی خان نے کہا ہے کہ ووٹ کی بے حرمتی گوارا نہیں کریں گے۔ پاکستان کا مفاد عوام کے مینڈیٹ کے مکمل احترام ہی میں پوشیدہ ہے‘خیبرپختونخوا، پنجاب اور وفاق میں اتحاد نہیں ہوگا ‘متنازع حلقوں میں دوبارہ گنتی نہ ہوئی تو اپوزیشن میں بیٹھیں گے ۔ گزشتہ روز ایک بیان میں انہوں نے کہا کہ پاکستان کے عوام نے بانی پی ٹی آئی عمران خان کے ”غلامی نامنظور“ کے ویژن پر مکمل اعتماد کا اظہار کیا ہے۔ عوام نےتحریک انصاف کو واضح اور شفاف مینڈیٹ سے نوازا ہے۔ فیصلے کے سامنے سرتسلیم خم کرنے کی بجائے پھر سے ریٹرننگ افسران کے ذریعے ان کا مینڈیٹ چرانے کی کوشش کی جارہی ہے۔ انتخابی نتائج کےساتھ غیرقانونی و قابل مذمت چھیڑ چھاڑ کرکے جمہوریت پر شب خون مارنے کی ناقابل قبول کوشش کی جارہی ہے۔ ایسی کوئی بھی کوشش ملک کیلئے سود مند ثابت ہوگی نہ ہی عوام اپنے ووٹ کی بے حرمتی گوارا کریں گے۔ انہوں نے انتخابی نتائج میں مبینہ ردو بدل ،نتائج میں غیر قانونی تاخیر اور تحریک انصاف کے حمایت یافتہ امیدواروں کی واضح جیت کو شکست میں بدلنے پر ریٹرننگ افسران کیخلاف پرامن احتجاج کا اعلان کرتے ہوئے کہا کہ کارکنان احتجاج میں شامل ہوں۔ ان کا کہنا تھا کہ مرکز ، پنجاب اورخیبرپختونخوا میں واضح اکثریت حاصل کرنے کے باعث حکومت سازی تحریک انصاف کا بنیادی دستوری و جمہوری حق ہے۔ علاوہ ازیں جیونیوزسے گفتگو کرتے ہوئے بیرسٹر گوہر کا کہناتھاکہ خیبرپختونخوا، پنجاب اور وفاق میں اتحاد نہیں ہوگا۔ صوبائی حکومت اور وزیر اعلی کے نام پر منگل تک فیصلہ ہوگا‘بیرسٹر گوہر نے کہا کہ کسی جماعت نے ہمارے آزاد امیدواروں سے رابطہ نہیں کیا، پارٹی نے میٹنگ بلائی ہے، تمام آزاد امیدوار رابطے میں ہیں، انہیں پارٹی حمایت حاصل ہے۔