12 خواتین مضبوط مرد اُمیدواروں کو شکست دیکر ممبرقومی اسمبلی منتخب

12 فروری ، 2024

لاہور( نمائندہ خصوصی ) انتخابات 2024میں چار سیاسی پارٹیوں کی 12 خواتین اپنے مدمقابل مضبوط مرد اُمیدواروں کو شکست دے کر قومی اسمبلی کی رکن منتخب ہوئی ہیں۔ان میں 5خواتین پی ٹی آئی حمایت یافتہ آزاد، 4 مسلم لیگ نون، 2 پیپلز پارٹی اور ایک کا تعلق ایم کیو ایم سے ہے۔ مریم نواز سمیت 4 خواتین انیقہ بھٹی، عائشہ جٹ، اور عمبر نیازی پہلی بار قومی اسمبلی کے ایوان میں براجمان ہوں گی۔الیکشن کمیشن کے نتائج کے مطابق پشاور سے شاندانہ گلزار، حافظ آباد سے انیقہ مہدی بھٹی ، وہاڑی سےعائشہ نذیر جٹ ، لیہ سے عنبر مجید نیازی اور ڈیرہ غازی خان سے زرتاج گل سخت مقابلے کے بعد کامیاب ہوئی ہیں، پانچوں خواتین پی ٹی آئی کی حمایت یافتہ ہیں۔ نون لیگ سے تعلق رکھنے والی خواتین سیالکوٹ سے نوشین افتخار، لاہور سے مریم نواز، ننکانہ صاحب سے شذرہ منصب اور وہاڑی سے تہمینہ دولتانہ مخالف امیدواروں کو شکست دیکر ایوان میں پہنچی ہیں۔ سندھ میں بھی تین خواتین نے بھی مقابلے کے بعد فتح اپنے نام کی ہے۔پیپلز پارٹی سے تعلق رکھنے والی شازیہ مری نے سانگھڑ اور نفیسہ شاہ نے خیر پور سے کامیابی حاصل کی ہے۔ جبکہ ایم کیو ایم کی آسیہ اسحق نے کراچی میں کامیابی حاصل کی ہے۔