انتخابی نتائج کیخلاف سیاسی جماعتوں کا احتجاج جاری ، JUIکا کراچی میں مظاہرہ

راولپنڈی،بنوں میر انشا ہ ،لاڑکانہ (خبر نگار خصوصی،سٹاف رپورٹر،نمائند گان جنگ،ایجنسی ) راولپنڈی کے مختلف مقامات پر تحریک انصاف کے کارکنان کی جانب سے انتخابی نتائج کے خلاف گزشتہ روز شدید احتجاج کیا گیا جس میں پی ٹی اآئی کے کارکنان نے کثیر تعداد میں شرکت کی جبکہ پولیس کی جانب سے شیلنگ اور لاٹھی چارج کیا گیا اورایک درجن سے زائد کارکنوں کو گرفتار کرلیاگیا اور پولیس کے لاٹھی چارج کے دوران صحافیوں کو بھی تشدد کا نشانہ بنایا گیا،تحریک انصاف کے این اے 56 اور 57 کے امیدواروں شہریار ریاض اور ثمابیہ طاہر پی پی 19 کے امیدوار تنویر اسلم نے صادق آباد چوک میں کارکنان سے خطاب کیا جبکہ کارکنان نے ڈسٹرکٹ الیکشن کمشنر دفتر کے باہر بھی احتجاج اور خوب نعرے بازی بھی کی ،پولیس کی شیلنگ و لاٹھی چارج کے بعد پی ٹی آئی کارکن منشتر ہوگئے تاہم ڈسٹرکٹ الیکشن کمیشن کو جانے والے راستہ کنٹینر خاردار تاریں اور بھاری نفری لگا کر بند کردیئے گئے ،بنوں کے حلقہ پی کے102میں انتخابی نتائج کی تبدیلی اور بوگس فارم کے ذریعے نتائج جاری کرنے کے خلاف پی ٹی آئی احتجاج تیسرے روز بھی جاری رہا، جس کے باعث بنوں میرانشاہ روڈ بند ،گا ڑیوں کی لمبی لمبی قطاریں لگ گئیں ،شمالی وزیرستان میں پی ٹی آ ئی اور این ڈی ایم کے اراکین کا احتجاج بھی جاری ہے ،اُدھر مبینہ انتخابی دھاندلی کے معاملے پر جے یو آئی کی اپیل پر لاڑکانہ سکھر شاہراہ کو مظاہرین نے بلاک کیا ،لاڑکانہ میں گوٹھ سچے بخش جاگیرانی کے مقام پر بھی جے یو آئی کے کارکنان نے دھرنا دیا،میرپورخاص میں بھی مبینہ انتخابی دھاندلی پر جے یو آئی( ف) کی جانب سے ٹول پلازہ پر دھرنا دیاگیا ۔