ہمیں مزدوری کے بدلتے تقاضوں کو پورا کرنے کیلئے اختراعی ہونے کی ضرورت ہے، سفیر پاکستان

12 فروری ، 2024

اسلام آباد (صالح ظافر) ابوظہبی ڈائیلاگ (اے ڈی ڈی) کے ساتویں وزارتی مشاورت سے خطاب کرتے ہوئے متحدہ عرب امارات میں پاکستان کے سفیر فیصل نیاز ترمذی نے کہا ہے کہ ٹکنالوجی مختلف مہارتوں کے تقاضوں کو بدل رہی ہے اور ہمیں مزدوری کے بدلتے ہوئے تقاضوں کو پورا کرنے میں اختراعی ہونے کی ضرورت ہے۔ مہارتوں کی نقل و حرکت کی شراکت داری کو فروغ دینے کے لیے مہارت کے سیٹ اور مشغولیت کو متنوع بنانے کی اشد ضرورت ہے۔ پاکستان ڈائیلاگ کا موجودہ سربراہ ہے اور یہ خلیج اور ایشیا کے 17 رکن ممالک کو ایک ساتھ لاتا ہے جس کا بنیادی مقصد مزدوروں کی نقل و حرکت سے متعلق مشترکہ مفادات کے مسائل کو حل کرنا ہے۔ متحدہ عرب امارات اور پاکستان اے ڈی ڈی میں فعال کردار ادا کر رہے ہیں۔ اس کی مشاورت متحدہ عرب امارات کے دارالحکومت ابوظہبی میں ہوئی جس میں دیگر ممالک کے سفیر بھی موجود تھے۔ فیصل نیاز ترمذی نے اے ڈی ڈی کی ان کوششوں کو سراہا جو سبز ملازمتوں میں خواتین پر توجہ مرکوز کر رہی ہے اور خواتین قابل تجدید توانائی سمیت صنعتوں میں مہارت کے اہم خلا کو پر کر سکتی ہیں۔ ان کا کہنا تھا کہ موسمیاتی تبدیلیاں اور قدرتی آفات بشمول سیلاب سب سے بڑے چیلنجز ہیں جنہوں نے نقصانات کو کم کرنے اور بہتر طریقے سے دوبارہ تعمیر کرنے کے لیے اجتماعی کوششوں کی اہمیت پر زور دیا ہے۔ انہوں نے یاد دلایا کہ متحدہ عرب امارات کی صدارت میں کاپ 28 کے نتائج نے اس چیلنج کا مقابلہ کرنے کی ضرورت کا اعادہ کیا ہے۔