بھارت:ہندو انتہاپسندوں کا عیسائی اسکولوں سے مذہبی علامات ہٹانے کا مطالبہ

12 فروری ، 2024

گواہاٹی(این این آئی)بھارت کی ریاست آسام میں ایک نامعلوم ہندو انتہا پسند گروپ نے عیسائی اسکولوں سے مطالبہ کیاہے کہ وہ اسکولوں سے مذہبی علامات کو ہٹائیں ورنہ سنگین نتائج کا سامنا کرنے کے لئے تیار رہیں۔ مبڈبم کے مطابق نامعلوم ہندو گروپ نے آسام کے عیسائی اسکولوں کو دھمکی دی ہے کہ وہ اسکولوں کے احاطوں سے صلیب اور مجسموں جیسی مذہبی علامات کو ہٹادیں ورنہ سنگین نتائج کے لئے تیار رہیں۔عیسائی اسکولوں اور تنظیموں نے دھمکیوں پر گہری تشویش کا اظہار کرتے ہوئے کہا ہے کہ یہ اقدام مذہبی آزادی کے اصولوں کی خلاف ورزی ہے اور ملک کی سیکولر بنیاد کے لئے نقصان دہ ہے۔ انہوں نے کہاکہ یہ ادارے اپنے متعلقہ عقائد کے اصولوں کو برقرار رکھنے کی ذمہ داری نبھاتے ہیں اور یہ علامات اور مجسمے مذہبی تعلیم کے لازمی اجزا ء ہیں اور انہیں ہٹانا مذہبی اقلیتوں کے بنیادی حقوق کی خلاف ورزی ہے۔