ایسا نظام بننا چاہئے آئندہ انتقامی کارروائیاں نہ ہوں، علی امین گنڈاپور

پشاور (این این آئی)تحریک انصاف کے نامزد وزیراعلیٰ خیبر پختونخوا علی امین گنڈاپور نے کہا ہے کہ ایسا نظام بننا چاہیے کہ آئندہ انتقامی کارروائیاں نہ ہوں۔ایک انٹرویو میں انہوں نے کہا کہ انتخابات میں دھاندلی نہیں دھاندلا ہوا ، مینڈیٹ کی چوری ملک سے غداری ہے ، دھاندلی سے لوگوں کو مسلط کیا جائے گا تو ملک ترقی نہیں کرسکے گا۔انہوں نے کہا کہ مختلف حلقوں میں مختلف طریقوں سے دھاندلی ہوئی ، ثبوث سامنے آرہے ہیں کہ کچھ آر اوز نے دھاندلی ہونے دی۔ انہوں نے کہ جیسے ہی دیگر مراحل ختم ہوں تو اسمبلی اجلاس بلا کر حلف لیں گے، امید ہے ٹریبونل اور عدالتوں سے ہمیں حق ملے گا۔انہوں نے کہا کہ جمہویت کا تقاضہ ہے عوامی حکومت بنے، کابینہ میں نئے لوگوں کو سامنے لایا جائے گا، ہمارے 50 فیصد سے زیادہ نئے چہرے اسمبلی میں آئے ہیں۔