IMFکے قرض سے غربت بڑھے گی ،پہلے ملک میں سیاسی استحکام لایا جائے، عمران خان

ا راولپنڈی(صباح نیوز) پاکستان تحریک انصاف کے بانی و سابق چیئرمین عمران خان نے کہا ہے کہ وہ آئی ایم کو خط اس لئے لکھیں گے کیونکہ اگر ایسے حالات میں ملک کو قرضہ ملا تو واپس کون کرے گا،اس قرض سے غربت بڑھے گی، جب تک سرمایہ کاری نہیں آئے گی، قرض بڑھتا جائے گا۔ راولپنڈی اڈیالہ جیل میں سماعت کے بعد میڈیا سے غیر رسمی گفتگو کرتے ہوئے بانی پی ٹی آئی نے کہا کہ سب سے پہلے ملک میں سیاسی استحکام لایا جائے، پہلے نواز شریف کی سلیکشن کے لیے اداروں کو تباہ کیا گیا، عدالتیں، نیب سب کچھ تباہ کیا گیا۔ بانی پی ٹی آئی نے اپنی بات جاری رکھتے ہوئے الزام لگایا کہ نواز شریف کیلئے مجھے زیرو کیا گیا، پھر انتخابات میں دھاندلی کرائی گی، اب کمشنر راولپنڈی کے انکشافات سامنے آئے، کمشنر کو اٹھا کر تشدد کیا گیا، ویگو میں ڈال کر اٹھا کر لے گئے، اب ان کا بھی سافٹ وئیر اپ ڈیٹ کردیا ہے۔