کورنگی، دو ڈکیت شہری کی فائرنگ سے مارے گئے

کراچی(اسٹاف رپورٹر)کورنگی میں لوٹ مار کرنے والے دو ڈکیت شہری کی فائرنگ سے مارے گئے،ڈکیتوں کی فائرنگ سے ایک شہری زخمی ہوا۔تفصیلات کے مطابق زمان ٹاون تھانے کی حدود کورنگی نمبر 3 سیکٹر48/C بانس والی گلی بلال مسجد کے قریب موٹر سائیکلوں پر سوار 4 مسلح ملزمان نے ڈکیتی میں مزاحمت پر گولی مار کر ایک شخص حفاظت ولد عبدالشکور کو زخمی کیا اور موقع سے فرار ہونے لگے۔ پولیس کے مطابق ملزمان نے گلی کے کونے پر موجود دوسرے شخص سے بھی اسلحے کے زور پر پرس اور موبائل فون چھین کر فرار ہو رہے تھے کہ شہری نے اپنے پستول سے ملزمان پر فائرنگ کر دی جس کے نتیجے میں دو ڈاکو زخمی ہوکر گرگئے،جبکہ ان کے دوساتھی جو دوسری موٹر سائیکل پر تھے موقع سے فرار ہوگئے،واقعہ کے بعد شہریوں کا ہجوم جمع ہوگیا اور انہوں نے گولیوں سے زخمی دونوں ملزمان کو تشدد کانشانا بنایا،دونوں شدید زخمی ملزموں کو اسپتال منتقل کیا جا رہا تھاکہ اسپتال پہنچے سے قبل دونوں ملزمان راستے میں ہی دم توڑ گئے۔پولیس کے مطابق دونوں ہلاک ڈکیتوں کی شناخت 19 سالہ عبدالرحمن ولد امیر حسین اور22 سالہ عبدالخالق ولد حسن علی کے نام سے ہوئی ہے،جن کے قبضے سے اسلحہ، موٹرسائیکل اور دیگر لوٹا ہوا سامان برآمد کیا گیا ہے۔