دھاندلی سے کامیاب جماعتوں کی سیاست ختم ہونےجارہی ہے، سراج الحق

لاہور(نیوز رپورٹر)امیر جماعت اسلامی سراج الحق نے کہا ہے کہ دھاندلی کے ذریعے کامیابی حاصل کرنے والی سیاسی جماعتوں پر عوام نے فل سٹاپ لگا دیا، ان جماعتوں کی سیاست عروج کی طرف نہیں بلکہ ختم ہونے جا رہی ہے۔ پی ڈی ایم کی جماعتوں کو 100سال بھی حکومت مل جائے ڈلیور نہیں کر سکتیں، نااہل حکمران جماعتیں بری طرح ایکسپوز ہو چکیں، دھاندلی زدہ الیکشن سے قومی اور عوامی مسائل میں اضافہ ہوا۔ جماعت اسلامی آئندہ سیاسی منظر نامے میں عوام کے ساتھ ہو گی اور اپوزیشن کا بھر پور کردار ادا کرے گی۔ دینی مدارس ملک و قوم کا اصل سرمایہ اور مستقبل ہیں اور دینی مدارس کے طلبہ ملک میں حقیقی تبدیلی اور اسلام کے نظام کی جدوجہد میں ہر اول دستے کا کردار ادا کریں گے۔ ان خیالات کا اظہار انہوں نے منصورہ میں جمعیت طلبہ عربیہ کی نومنتخب قیادت سے گفتگو کرتے ہوئے کیا۔ مدارس کے طلبہ کے وفد کی قیادت منتظم اعلیٰ جمعیت طلبہ عربیہ محمد افضل نے کی۔ وفد میں مرکزی لیڈر شپ بھی موجود تھی۔دریں اثنا سراج الحق سے نومنتخب صدر ہائیکورٹ بار ایسوسی ایشن اسد منظور بٹ نے وفد کے ہمراہ منصورہ میں ملاقات کی۔ امیر جماعت نے اسد منظور بٹ کو ہائیکورٹ بار ایسوسی ایشن کا صدر منتخب ہونے پر مبارکباد دی۔