لاہور(خصوصی نمائندہ،اپنے نامہ نگار سے ،جنگ نیوز)صدر مملکت عارف علوی نے قومی اسمبلی کا اجلاس اب تک نہیں بلایا۔صدر عارف علوی کو چار دن پہلے وزارتِ پارلیمانی امور نے سمری بھیجی تھی، صدر مملکت نے اجلاس بلانے کی سمری پر اب تک دستخط نہیں کیے۔ذرائع کا دعویٰ ہے کہ صدر مملکت کا مؤقف ہے کہ ایوان ابھی مکمل نہیں،کچھ مخصوص نشستوں کا فیصلہ ہونا باقی ہے۔عارف علوی نے تاحال سمری منظوریا مسترد نہیں کی صرف زبانی مؤقف سامنے آیا ہے۔نگران وفاقی حکومت کا مؤقف ہے کہ آرٹیکل91کی دفعہ 2 کے تحت 21 دن تک اجلاس بلانا لازمی ہے، صدراجلاس نہیں بھی بلاتے تو 29 فروری کو قومی اسمبلی کا اجلاس ہر صورت ہوجائے گا اور 29 فروری کو ہونے والا اجلاس آئین کے عین مطابق ہوگا۔ مسلم لیگ (ن) کے سینئر رہنما سابق وفاقی وزیر خزانہ سنیٹر اسحاق ڈار نے کہا ہے کہ صدر مملکت نے سمری پر اجلاس نہ بلایا تو 29 فروری کو سپیکر آئینی طورپر خود اجلاس بلا سکتا ہے۔پنجاب اسمبلی میں مریم نواز کے وزیر اعلیٰ پنجاب کیلئے کاغذات نامزدگی جمع کروانے کے بعد میڈیا سے گفتگو کرتے ہوئے اسحاق ڈار نے کہا کہ آئین میں بڑا واضح ہے کہ اگر اجلاس نہیں بلایا جاتا تو 21ویں روز سپیکر کو اجلاس بلانے کا اختیار ہے، آئین کی 21دن کی مہلت کے حساب سے 29فروری آخری تاریخ بنتی ہے، صوبوں میں بھی اگر گورنر اجلاس نہیں بلاتا تو وہاں بھی یہی اصول لاگو ہوگا۔انہوں نے مزید کہا کہ معیشت کیسے درست ہوگی ایسے فلور پر یہ نہیں ڈسکس کر سکتا۔ نومنتخب رکن قومی اسمبلی عطا تارڑ نے کہا ہے کہ اس وقت ایوانِ صدر سازشوں کا گڑھ بنا ہوا ہے، صدر مملکت اپنے عہدے سے انصاف نہیں کر سکے۔پارٹی سیکرٹریٹ میں پریس کانفرنس کرتے ہوئے لیگی رہنما عطا تارڑ نے کہا کہ صدر علوی تحریک انصاف کے عہدے داروں سے خفیہ ملاقاتیں کر رہے ہیں، عارف علوی قومی اسمبلی کا اجلاس نہیں بلا رہے،قومی اسمبلی اجلاس کی سمری صدر مملکت کو بھیجی گئی لیکن صدر اپنی آئینی ذمہ داری نبھانے سے گریزاں ہیں۔انہوں نے کہا کہ صدر مملکت پاکستان میں جمہوریت کو نقصان پہنچانے کے لیے تحریک انصاف کے کارکن بنے ہوئے ہیں، قومی اسمبلی کے ارکان کے نوٹیفکیشن ہوچکے ہیں، صدر مملکت اجلاس بلائیں، اگر انہوں نے اجلاس نہ بھی بلایا تو سپیکر قومی اسمبلی کو اجلاس بلانے کا اختیار حاصل ہے، قومی اسمبلی کا اجلاس 29 فروری کو ہی ہوگا۔عطا تارڑ کا کہنا تھا کہ ایک قیدی جس نے اربوں روپے کی کرپشن کی ہے اور اس الزام میں وہ جیل میں قید ہے آئی ایم ایف کو خط لکھنے جا رہا ہے،یہ قیدی کس حیثیت سے آئی ایم ایف کو خط لکھ رہا ہے؟ کیا یہ قیدی آئی ایم ایف کو اپنی کرپشن کے بارے میں بھی لکھے گا؟انہوں نے مزید کہا کہ ہم تو میثاقِ جمہوریت کی طرف جا رہے ہیں لیکن صدر مملکت جمہوریت کو پٹری سے ہی اتارنے پر تُلے ہوئے ہیں، صدر مملکت کا جب جی چاہتا ہے کہتے ہیں میں نے جیل میں بانی پی ٹی آئی سے ملاقات کرنی ہے، جب جی چاہتا ہے ریاست مخالف بیانیے کو پروان چڑھاتے ہیں ،مسلم لیگ( ن) کے سنیٹرعرفان صدیقی نے کہا کہ قومی اسمبلی کا اجلاس تو ہو ہی جانا ہے،عارف علوی کادورپہلے ہی افسوسناک غیرجمہوری وارداتوں سےبھرا پڑاہے،صدرعلوی گھرجاتے جاتےاپنی پوشاک پرسیاہ داغوں سےپاک تھوڑی سی جگہ تورہنے دیں ، پنجاب اسمبلی میں پیپلز پارٹی کے پارلیمانی لیڈر سید علی حیدر گیلانی نے کہا ہے کہ قومی اسمبلی کا اجلاس کسی کی ذاتی انا اور ضد کی بھینٹ نہیں چڑھنا چاہیے،ایوان صدر کو ایک مرتبہ پھر جمہوریت کش اقدامات کے لیے استعمال کیا جا رہا ہے۔اپنے ایک بیان میں انہوں نے کہا کہ صدر وزیر اعظم کی ایڈوائس پر عمل درآمد کے پابند ہیں،آئین کا آرٹیکل 91 انہیں مقررہ وقت کے اندر قومی اسمبلی کا اجلاس بلانے کا پابند کرتا ہے۔انہوں نے مزید کہا کہ صدر علوی اپنی مدت ختم ہونے کے باوجود ایوان صدر میں براجمان ہیں،قومی اسمبلی کا اجلاس بلانے میں لیت و لعل سے کام لینے والے کسی اور کے ایجنڈے پر گامزن ہیں،عارف علوی کے کمنٹس ان کی جانبداری ظاہر کرتے ہیں، وہ ایوان صدر کے تقدس کا خیال رکھیں۔ ادھر سیکرٹری اطلاعات پیپلزپارٹی پارلیمنٹیرینز شازیہ مری نے کہا کہ صدر کی طرف سے نئی منتخب اسمبلی کا اجلاس بلانے میں تاخیر اپنے اختیار کا ناجائزاستعمال ہے۔شازیہ مری نے کہا کہ صدر پرلازم ہے کہ وہ وزیراعظم کی سمری پر بلاتاخیر قومی اسمبلی کا اجلاس طلب کریں تاکہ قومی اسمبلی متحرک ہو، صدر ایک شخص کی وفاداری کے بجائے آئین کی پاسداری کریں، یاد رہے یہ وہی صدر ہے جس نے ماضی میں قومی اسمبلی کو غیر آئینی طریقے سے ختم کیا تھا۔انہوں نے مزید کہا کہ صدر ماضی کی طرح آئین سے کھیلنے سے گریز کریں، صدر عارف علوی کی ہر آئین شکنی اورعہدے کا غلط استعمال تاریخ کا حصہ رہے گا، قومی اسمبلی کے انتخابات مکمل ہوچکے، صدرقومی اسمبلی کا اجلاس بلانے کے پابند ہیں۔
اسلام آ باد وزیر اعظم نے سی ایس ایس کے پیشہ وارانہ گروپس اینڈ سروسز میم کی منظوری دیدی ۔ تر میم تحت رولز میں...
لاہورلاہور ہائیکورٹ کے صفحجسٹس خالد اسحاق نےپنجاب حکومت سے 71 کروڑ سے زائدواجبات نہ ملنے کیخلاف آل پاکستان...
اسلام آباد عمران خان کو اڈیالہ جیل راولپنڈی سے لاہور کی کوٹ لکھپت جیل منتقل کرنے کا دوبارہ امکان پیدا...
اسلام آباد بجلی کی 3 اہم ڈسٹری بیوشن کمپنیوں ، فیصل آباد الیکٹرک سپلائی کمپنی ، گوجرانوالہ الیکٹرک پاور...
پشاور خیبر پختونخوا کو 12 عالمی اداروں کی جانب سے 56 منصوبوں کے لئے گرانٹس اور قرضے فراہم کئے جارہے ہیں جن کی کل...
اسلام آباد ایف بی آر کی جانب سے نااہل افراد کے لیے 10 ملین روپے سے زائد کی پراپرٹی کی خرید و فروخت پر...
اسلام آباد نیپرا نے سکیورٹی ڈپازٹ ریٹس میں 200 فیصد سے زائد کے اضافے کی درخواست پر ڈسکوز کو آڑے ہاتھوں لیا...
کراچی جیو کے پروگرام ’’آج شاہزیب خانزادہ کے ساتھ‘‘میں گفتگو کرتے ہوئے عمران خان کے وکیل فیصل چوہدری نے...